Zyra e Rregullatorit për Energji (ZRrE), e ka refuzuar kundërshtimin administrativ të Partisë Demokratike të Kosovës ndaj vendimit që 1300 biznese vendore të kalojnë në tregun e lirë të energjisë elektrike.
Një gjë të tillë e ka bërë të ditur PDK përmes një reagimi ndaj këtij refuzimi, teksa e ka cilësuar këtë si një hap që rrezikon mijëra vende pune dhe cenon seriozisht stabilitetin ekonomik të vendit.
“Ky është një vendim thellësisht i padrejtë, joprofesional, i njëanshëm dhe skajshmërisht politik në thelb. ZRrE, që duhet të jetë një institucion në shërbim të qytetarëve dhe ekonomisë së vendit, ka zgjedhur t’i mbyllë sytë para pasojave katastrofike të këtij vendimi për sektorin privat – shtyllën kryesore të zhvillimit ekonomik dhe punësimit në Kosovë”, thuhet në reagimin e PDK-së.
Tutje ky subjekt politik ka bërë të ditur se nuk do të ndalet në synimin për t’i mbrojtur bizneset dhe punëtorët ndaj këtij vendimi.
“Lufta jonë nuk ndalet me një letër refuzuese. Lufta jonë është për të drejtat e bizneseve që mezi mbijetojnë në një klimë të vështirë ekonomike. Lufta jonë është për punëtorët, për rrogat e tyre, për mirëqenien e familjeve të tyre. PDK njofton se këtë betejë të drejtë do ta vazhdojë në Gjykatë. Jemi të bindur se e drejta është në anën tonë dhe nuk do të ndalemi përballë asnjë institucioni që zbaton politika të dëmshme, pa ndjeshmëri sociale e pa përgjegjësi shtetërore”, thuhet tutje në reagim.
