Artan Nimani nga Nisma Socialdemokrate duke komentuar planin 15-pikësh për Qeverinë e Unitetit të propozuar nga Lidhja Demokratike e Kosovës ka thënë se krijimi i institucioneve nuk bëhet me pika.
Nimani në emisionin “Ditari” në Tëvë1 është shprehur se krijimi i institucioneve kërkon kompromis, sakrificë dhe angazhim praktik konkret për tejkalim të krizës.
“Kjo punë nuk bëhet me pika. Krijimi i institucioneve nuk bëhet duke shkruar diçka të bukur në letër. Krijimi i institucioneve kërkon një kompromis një sakrificë një angazhim praktik konkret për tejkalimin e krizës. Nuk tejkalohet kriza me rreshtimin e 15 pikave se për ashtu edhe unë tani mund t’i rreshtoj edhe 15 pika të tjera që janë të domosdoshme dhe jetike për qytetarët e Kosovës. Por a jemi ne ata që vendosim? Jo. Atëherë cili duhet të jetë hapi. Hapi konkret duhet të jetë që lideri i LDK-së, i PDK-së, i AAK-së i NISMËS të grupohen në një mes dhe të dalin me një qëndrim të përbashkët”, ka thënë Nimani.
Kryetari i Lidhjes Demokratike të Kosovës (LDK), Lumir Abdixhiku, të enjten ka prezantuar agjendën 15 pikëshe të Qeverisë së Unitetit Kombëtar. Ai tha se vetëm një qeveri e Unitetit Kombëtar është zgjidhja.
Në axhendën që kjo qeveri duhet të ketë, sipas LDK-së, deri në mbajtjen e zgjedhjeve të reja brenda 10 muajsh, është ajo për vendosjen në funksion të intitucioneve kushtetuese, zgjidhje të krizës energjetike, rivendosje e marrëdhënieve me BE-në dhe SHBA-të, hartimin e një platfortme unike për dialogun me Serbinë, votim të marrëveshje ndërkombëtare të bllokuara në kuvend, por edhe nisje të vetingut në sistemin e drejtësisë apo nisje të procesit të gazifikimit të vendit.
