Të martën në Bruksel është zhvilluar një takim trepalësh në mes të zëvendëskryeministrit në detyrë Besnik Bislimi, kryenegociatorit serb, Petar Petkoviq dhe emisarit të BE-së për dialogun Kosovë-Serbi, Peter Sorensen.
Pas këtij takimi, Petkoviq ka deklaruar se delegacioni i Beogradit ka insistuar për formimin e Asociacionit të Komunave me Shumicë Serbe, si dhe ka paraqitur një plan për deeskalimin e situatës në veriun e Kosovës.
Këtë deklaratë të kryenegociatorit serb, Bislimi, e ka quajtur mashtrim, pasi sipas tij, gjatë takimit trepalësh është diskutuar vetëm për parimet bazë dhe rrugën për zbatimin e Marrëveshjes Themelore dhe nuk ka pasur pajtim për çështje të tjera.
Ai ka thënë se Kosova ishte e gatshme të diskutonte në mënyrë konstruktive pikat e agjendës të propozuara nga Sorensen, ndërsa Serbia e kundërshtoi një gjë të tillë, duke imponuar një hierarki të re të temave.
“Faktikisht, pasaktësia është e lehtë për t’u verifikuar me Përfaqësuesin Special të BE-së (EUSR), pasi takimi trepalësh diskutoi vetëm parimet bazë dhe rrugën për zbatimin e Marrëveshjes Themelore, dhe nuk pati pajtim për agjendën nën “çështje të tjera”. Kosova ishte e gatshme të diskutonte në mënyrë konstruktive pikat e agjendës të propozuara nga Përfaqësuesi Special i BE-së dhe të rekomandonte çështje shtesë. Në mënyrë përçarëse, Serbia këmbënguli që të braktisej tërësisht agjenda dhe u përpoq të impononte një hierarki të re të temave. Kjo na pengoi të diskutonim të paktën tetë tema me përfitim të ndërsjellë për qytetarët në të dy vendet. Diskutimet vazhduan në format dypalësh (BE dhe Serbia; BE dhe Kosova). Petkoviq nuk i dalloi temat e diskutuara gjatë takimeve dypalëshe dhe atyre trepalëshe. Ky deklarim i manipuluar është transmetuar nga media të shumta si B92, Telegraf, Kurir, EuroNews Serbia dhe RTV. Është e qartë se mashtrimi ishte i qëllimshëm, pasi deklarata e përsërit të njëjtën gjë më vonë në tekst. Deklarata që atëherë është ndryshuar, ndoshta pas ndërhyrjes së Përfaqësuesit Special të BE-së me të cilin Kosova e ngriti këtë çështje brenda disa minutash. Historitë në media mbajnë të njëjtin tekst, gjë që na çon në përfundimin se asnjë përgënjeshtrim nuk është ndarë me mediat. Më keq, lajmi i modifikuar në faqen e internetit ruan datën origjinale pa ndonjë shënim se është ndryshuar më pas. Pjesa tjetër e tekstit është ndryshuar gjithashtu, por ruan skenarin e qëndrueshëm propagandistik të Serbisë për të nxitur urrejtje, duke penguar procesin e normalizimit dhe duke dekurajuar serbët e Kosovës nga integrimi”, ka shkruar Bislimi në platformën “X”.
Exposure of Serbia’s chief Negotiator deceptive statement after the Brussels meeting in June 10th.
Petkovic statement:https://t.co/jCHbL8dEV5https://t.co/CCXDZpYTC7 pic.twitter.com/Lb08inekoz
— Besnik Bislimi (@BislimiBesnik) June 12, 2025
