Deputetja e Lëvizjes Vetëvendosje, Albulena Haxhiu e ka quajtur tendencë për minimizim dhe shkelje të vullnetit të popullit, propozimin e kryetarit të LDK-së, Lumir Abdixhiku për një Qeveri të Unitetit.
Haxhiu, ka theksuar se një propozim i tillë nuk e ka mbështetjen e Lëvizjes Vetëvendosje, pasi sipas saj qytetarët e Kosovës e kanë thënë fjalën e tyre në zgjedhjet e 9 shkurtit duke e nxjerrë të parin këtë subjekt politik.
“Sa i përket propozimit që vjen nga partia e tretë që ka dalë në zgjedhje do të thotë nga kryetari i LDK-së, Lumir Abdixhiku ne kërkojmë unitet për konstituimin e Kuvendit të Kosovës, pra është e rëndësishme që të kemi unitet. Qytetarët e Kosovës e kanë thënë fjalën e tyre në zgjedhjet e 9 shkurtit, kryeministri Kurti është lideri më i votuar ndonjëherë në Kosovë dhe Lëvizja Vetëvendosje sot është subjekti i parë me më së shumti vota në Kuvend prandaj propozimet e tilla janë tendencë për të minimizuar vullnetin e popullit, për të shkelur atë dhe natyrisht nuk e kanë mbështetjen e Lëvizjes Vetëvendosje”, ka thënë Haxhiu pas dështimit të seancës së 29-të të Kuvendit të Kosovës.
