Presidentja e Kosovës, Vjosa Osmani ka thënë se vonesa në konstituimin e Kuvendit përveç dëmtimit të kredibilitetit të institucioneve dëmton edhe agjendën drejt integrimit në BE dhe NATO.
Ajo kështu është shprehur në një takim me përfaqësues të shoqërisë civile, ku temë diskutimi ishte kriza institucionale.
“Sipas Presidentes Osmani vonesa në konstituimin e Kuvendit dëmton jo vetëm kredibilitetin e institucioneve, por edhe përparimin e vendit drejt agjendës euroatlantike. Në këtë drejtim, Presidentja ripërsëriti përkushtimin e saj për të garantuar funksionalitet institucional dhe për të vepruar në përputhje me Kushtetutën, në interes të qytetarëve të Republikës së Kosovës. Presidentja Osmani u shpreh e gatshme që të vazhdojë të mbetet e hapur për dialog me shoqërinë civile, në funksion të ruajtjes së rendit demokratik dhe forcimit të institucioneve përfaqësuese të vendit”, thuhet në komunikatën e Presidencës.
