Presidenti amerikan, Donald Trump njoftoi të mërkurën rikthimin e një prej politikave më të debatueshme të mandatit të tij të parë – ndalimin e udhëtimit për qytetarët e disa vendeve drejt Shteteve të Bashkuara.
Kjo masë e re do të hyjë në fuqi të hënën në orën 12:01 të mëngjesit dhe synon të shmangë kaosin që shpërtheu në aeroporte në vitin 2017, kur një ndalim i ngjashëm hyri në fuqi pa paralajmërim.
Ndalimi përfshin qytetarë nga 12 vende: Afganistani, Myanmari, Çadi, Republika e Kongos, Guinea Ekuatoriale, Eritrea, Haiti, Irani, Libia, Somalia, Sudani dhe Jemeni. Përveç kësaj, do të vendosen kufizime të reja për shtetasit nga Burundi, Kuba, Laosi, Sierra Leone, Togo, Turkmenistani dhe Venezuela.
Trump e justifikoi këtë veprim me argumente të sigurisë kombëtare, duke përmendur një sulm terrorist të ndodhur së fundmi në Boulder, Kolorado. Megjithëse i dyshuari ishte nga Egjipti – një vend që nuk përfshihet në listën e ndaluar – Trump theksoi rrezikun që vjen nga ata që qëndrojnë më gjatë se sa lejon viza.
Ai argumentoi se shumë nga këto vende nuk kanë sisteme të besueshme për kontrollin e pasaportave dhe verifikimin e identitetit, duke i cilësuar si vende me “kontrolle të mangëta” dhe “bashkëpunim të kufizuar”.
Përfshirja e Afganistanit ka shkaktuar zemërim, veçanërisht mes mbështetësve që kanë ndihmuar në zhvendosjen e qytetarëve afganë që bashkëpunuan me forcat amerikane gjatë luftës. Përjashtime janë bërë për afganët me Viza Speciale Imigrantësh, ka raportuar AP.
Afganistani, një nga vendet me më shumë refugjatë që kërkojnë strehim në SHBA, ka mungesë të një autoriteti qendror dhe nivele të larta të tejkalimit të vizave, sipas Trump.
Edhe Haiti është përfshirë për herë të parë në këtë listë, për shkak të numrit të madh të emigrantëve të parregullt dhe problemeve me sistemin e sigurisë së brendshme. Presidenti Trump theksoi se vendi nuk mund të garantojë se shtetasit e tij nuk do të përbëjnë kërcënim për SHBA-në.
Irani, i cilësuar nga administrata Trump si “sponsor shtetëror i terrorizmit”, mbetet në listë, me përjashtime vetëm për ata që aplikojnë për arsye humanitare apo për persekutim fetar. Vendet e tjera të përfshira në ndalim, si Libia, Jemeni dhe Sudani, janë të përfshira në konflikte të brendshme dhe kriza humanitare.
Organizatat ndërkombëtare të ndihmës dhe avokatët e të drejtave të njeriut e kanë dënuar ashpër këtë politikë, duke e quajtur diskriminuese dhe kundër vlerave amerikane. Abby Maxman, presidente e Oxfam America, tha se kjo politikë nuk ka të bëjë me sigurinë kombëtare, por me nxitjen e ndarjes dhe përjashtimit.
Ndalimi bazohet në një urdhër ekzekutiv të nënshkruar nga Trump më 20 janar, i cili i ngarkon agjencitë federale të identifikojnë vendet që përfaqësojnë një rrezik për SHBA-në për shkak të “qëndrimeve armiqësore” apo mungesës së bashkëpunimit në çështjet e sigurisë.
Ky veprim i fundit ngjason me ndalimin e parë të udhëtimit të Trump në vitin 2017, i cili shkaktoi konfuzion masiv në aeroportet amerikane dhe preku qytetarë nga shtatë vende me shumicë myslimane.
Edhe këtë herë, ndalimi pritet të përballet me sfida ligjore dhe kritika të ashpra nga organizata të të drejtave të njeriut dhe komuniteti ndërkombëtar.
