Moskonstituimin e Kuvendit dhe situatën politike të krijuar në Kosovë si pasojë e kësaj, publicisti, Kim Mehmeti e ka quajtur tallje të deputetëve me popullin.
Ai në emisionin “Këndi i Debatit” në Tëvë1 ka theksuar se do të ishte një leksion i mirë dhe i shëndetshëm ndaj politikanëve nëse populli në rast zgjedhjesh do t’i ndëshkonte duke mos iu dhënë votën.
“Këtë që e bëjnë sot me Parlamentin me moslejimin e konstituimit të Kuvendit kjo është me të vërtetë e dënueshme dhe ky popull këtë duhet ta dënojë nëse shkohet në zgjedhje, duhet t’iu tregojë këtyre politikanëve se ai popull nuk është edhe aq që nuk merr vesh kush e çfarë bën. Tani këta janë duke u tallur me popullin, edhe populli duhet t’ua jap një leksion të mirë edhe t’iu tregojë sesi populli do të tallet me ata. Kjo nëse ndodhë do të jetë shumë e shëndetshme. Pra, duhet të dalin dhe t’iu japin porosinë se nuk lihet fati i popullit dhe shtetit në duart e kujtdo qoftë vetëm pse ka dalë dhe ka themeluar parti të dajallarëve, të vëllezërve, të kushërinjve edhe tash duhet ta votojmë. Nuk e votojmë, nëse duhet nuk e votojmë asnjërin por do i votojmë ata që në mos tjetër kanë një respekt elementar ndaj popullit, ndihen përgjegjës dhe që kanë ndërgjegje”, është shprehur Mehmeti.
I pyetur nëse mendon që në zgjedhjet e ardhshme ndonjëra nga partitë aktuale rrezikon të mos jetë pjesë e Kuvendit, ai ka thënë se do të dëshironte të tregohej një pjekuri e tillë.
Sipas Mehmetit, me këtë do të kuptohej më qartë se deputetët në vend se të merren me vlerësimin e njëri-tjetrit duhet të zgjidhin problemet e Kosovës.
“Unë shpresoj dhe dua që ky popull ta tregojë këtë pjekuri ndaj këtyre politikanëve dhe t’u thotë që ju nuk mundeni të talleni me ne, e cilët janë ata le të vendosë populli se këtu ka parti që me tre deputetë e kushtëzon tërë Kosovën, epo nuk mundet ashtu që me tre deputetë ta marrësh në dorë fatin e 2 milionëve e të thuash që kështu do të bëhet. Në fund të fundit edhe populli nuk i zgjedh ata që ta vlerësojnë njëri-tjetrin por ta ndihmojnë njëri-tjetrin edhe të punojnë për Kosovën. Mirëpo, këtu ka një problem, këtu nuk ekziston institucioni i përgjegjësisë. Këtu këta mendojnë se mjafton të të votojnë, të bëhesh deputet edhe më nuk ke asnjë përgjegjësi ti, mandej vetëm të marrësh rrogën, tenderin dhe mund të pasurohesh. Shumica prej tyre mendojnë për popullin gjatë fushatës zgjedhore, iu kujtohet që ka popull pas asaj këta mendojnë vetëm për përfitime personale”, ka thënë ai./teve1.info/
