Delegacionet nga Rusia dhe Ukraina u mblodhën të hënën në Turqi për raundin e dytë të bisedimeve të drejtpërdrejta për paqe në më shumë se dy javë.
Pritshmëritë për ndonjë përparim të rëndësishëm mbetën të ulëta, për shkak të intensifikimit të luftimeve gjatë fundjavës, ka shkruar AP.
Ukraina njoftoi se të dielën kishte ndërmarrë një sulm të befasishëm në pesë baza ajrore ruse të shpërndara në të gjithë territorin e Rusisë – nga afër Moskës deri në rajonet e Arktikut, Siberisë dhe Lindjes së Largët – në një distancë mbi 7,000 kilometra nga territori ukrainas.
Presidenti ukrainas, Volodymyr Zelenskyy e përshkroi operacionin si një “aksion të shkëlqyer”, që kishte qenë në përgatitje për më shumë se një vit. Ukraina pretendoi se kishte shkatërruar mbi 40 avionë luftarakë rusë.
Në të njëjtën kohë, Rusia nisi një sulm të paprecedentë me dronë në Ukrainë, duke lëshuar 472 dronë, sipas Forcave Ajrore të Ukrainës. Ky ishte sulmi më i madh ajror i këtij lloji që nga nisja e pushtimit në shkallë të plotë më 2022, një përpjekje e dukshme për të mbingarkuar mbrojtjen ajrore ukrainase.
Përpjekjet ndërkombëtare të udhëhequra nga Shtetet e Bashkuara për të bindur palët që të bien dakord për një armëpushim deri tani kanë dështuar.
Komentet e fundit nga zyrtarët e lartë në të dyja vendet tregojnë se pozicionet e tyre mbeten shumë larg njëra-tjetrës në lidhje me kushtet për një armëpushim dhe përfundim të luftës.
Raundi i parë i bisedimeve u zhvillua më 17 maj, gjithashtu në Stamboll, dhe zgjati më pak se dy orë. Edhe pse palët ranë dakord për një shkëmbim të madh të të burgosurve, nuk u arrit asnjë progres konkret për ndalimin e luftimeve.
Për raundin e dytë, delegacioni ukrainas i kryesuar nga Ministri i Mbrojtjes Rustem Umerov ndodhej në Stamboll, sipas një deklarate të zëdhënësit të Ministrisë së Jashtme të Ukrainës, Heorhii Tykhyi.
Nga ana tjetër, delegacioni rus i udhëhequr nga Vladimir Medinsky, këshilltar i Presidentit Vladimir Putin, mbërriti të dielën në mbrëmje, sipas mediave shtetërore ruse.
Autoritetet turke njoftuan se bisedimet do të fillonin në orën 13:00 sipas orës lokale dhe do të kryesoheshin nga Ministri i Jashtëm Hakan Fidan, me pjesëmarrjen edhe të zyrtarëve të inteligjencës turke.
