Kryeministri në detyrë i Kosovës, Albin Kurti së bashku me ministren në detyrë të Arsimit, Arbërie Nagavci kanë marrë pjesë në gurthemelin e objektit të shkollës “Nuhi Gashi” në fshatin Bradash të Podujevës.
Kurti ka bërë të ditur se objekti i ri ka vlerë 625 mijë euro, 10 klasa, kabinete të nevojshme, hapësira për administratë si dhe tualete moderne, të përshtatshme edhe për fëmijët me nevoja të veçanta.
“Shkolla e re “Nuhi Gashi” në Bradash do të ketë nëntë klasë mësimore, një sallë të arsimtarëve, hapësirë për administratë, tualete moderne, që përfshijnë edhe ato për fëmijët me nevoja të veçanta, dhe do të shtrihet në një sipërfaqe të gjithmbarshme prej 1,330 m². Ajo është investimi i radhës i Komunës së Podujevës në arsim, që kësaj radhe është në vlerë prej afër 625 mijë euro. Punimet planifikohen të kryhen për dy vjet, por me kryetarin Bulliqi do të përpiqemi që të përfundojnë edhe më shpejt se aq”, ka njoftuar Kurti në Facebook./teve1.info/
