Ministria e Shëndetësisë në Gaza ka publikuar përditësimin e saj të fundit mbi numrin e viktimave nga sulmet izraelite.
Sipas të dhënave të spitaleve në Rripin e Gazës (përjashtuar Guvernatoratin Verior për shkak të pamundësisë për të hyrë në zonë), të paktën 79 persona u vranë dhe 163 u plagosën gjatë 24 orëve të fundit, raporton Al Jazeera.
Kjo e çon numrin e përgjithshëm të të vrarëve që nga fillimi i luftës në 54,056, ndërsa mbi 123,000 të tjerë janë plagosur.
Mbeten ende viktima nën rrënoja dhe në rrugë, ku ekipet e shpëtimit nuk mund të ndërhyjnë për shkak të rrezikut dhe mungesës së aksesit.
Sipas Organizatës Ndërkombëtare për Migracionin të OKB-së, vetëm në dhjetë ditë, deri më 25 maj, sulmet ndaj kampeve të zhvendosjes kanë detyruar mbi 180,000 njerëz të largohen përsëri nga vendstrehimet e tyre.
Grupi Global i Koordinimit dhe Menaxhimit të Kampeve (CCCM) ka denoncuar ashpër sulmet ndaj zonave të mbrojtjes civile, përfshirë sulmet ajrore në tendat në al-Mawasi dhe një shkollë e shndërruar në strehë në qytetin e Gazës.
Që nga rifillimi i ofensivës izraelite më 18 mars, mbi 260 vende të strehimit, ku qëndronin rreth 125,000 persona, janë prekur nga urdhrat e evakuimit të detyruar.
CCCM i OKB-së ka bërë thirrje për ndalimin e menjëhershëm të sulmeve në këto zona, garantimin e aksesit të sigurt për ndihma humanitare dhe mbrojtjen e civilëve, në përputhje me të drejtën ndërkombëtare humanitare.
