Është stacioni kryesor i Policisë së Kosovës në qytetin e Podujevës.
E të dielën, zyrtarëve policor, iu doli punë 20 metra larg vendit të tyre të punës.
Kjo meqë pranuan informatën, se në këtë lokal, po zhvillohej aktivitet i jashtëligjshëm.
Brenda tij, dyshohet se klientëve u mundësohej të luanin lojërat e fatit ilegalisht përmes skemave online.
“Janë shoqëruar në stacionin policor dy të dyshuar meshkuj kosovarë, pasi që në lokalin e tyre dyshohet se kishin organizuar lojëra të fatit online. Pas intervistimit me vendim të prokurorit të dyshuarit janë liruar dhe rasti shkon në procedurë të rregullt”, thuhet nga Policia e Kosovës.
Ndaj pronarit, G.H dhe P.B, është iniciuar rasti penal për “Organizim të skemave piramidale dhe bixhozit të paligjshëm”.
Ndërsa, me vendim të prokurorit, dy të dyshuarit janë liruar me procedurë të rregullt, gjersa hetimet po vazhdojnë.
Përveç stacionit policor, në afërsi të këtij lokali ndodhet edhe objekti i Komunës së Podujevës.
Këta të fundit thonë se nuk ishin në dijeni për aktivitetin që zhvillohej brenda tij.
“Ne nuk kemi qenë të njoftuar për zhvillimin e këtij aktiviteti ilegal. E mbështesim plotësisht ndërhyrjen dhe veprimet e organeve të rendit për mbylljen e këtyre lokaleve ku janë zhvilluar lojëra të fatit në kundërshtim me ligjin. Tani u takon organeve të drejtësisë të veprojnë ndaj përgjegjësve dhe të sigurojnë që ligji të zbatohet pa përjashtim”, thuhet nga Komuna e Podujevës.
Tëvë1 të hënën ka kërkuar një qëndrim edhe nga pronarët e lokalit.
Por të njëjtit, nuk kanë pranuar të flasin para kamerës, me arsyetimin se tani me rastin, po merren organet e rendit.
