Ushtria izraelite ka vendosur nëntë brigada të rregullta këmbësorie dhe të blinduara në Rripin e Gazës gjatë 24 orëve të fundit, si pjesë e një përshkallëzimi të dukshëm të ofensivës tokësore kundër enklavës palestineze, e cila po përballet me pasoja katastrofike humanitare.
Sipas transmetuesit publik izraelit KAN, i cili citoi burime ushtarake të paidentifikuara, dislokimi i brigadave është pjesë e një faze të re të manovrave tokësore në territor. Ndonëse nuk u dhanë shifra të sakta për numrin e trupave të përfshirë, prania e kaq shumë njësive sugjeron përgatitje për një fushatë të gjatë dhe intensive.
Zgjerimi i ofensivës vjen pas miratimit nga Kabineti i Sigurisë i Izraelit më 4 maj të operacionit të koduar “Qerrat e Gideonit”, një plan që synon shtrirjen e ofensivës ushtarake në gjithë Gazën.
Si pjesë e këtij plani, qeveria izraelite ka thirrur dhjetëra mijëra rezervistë dhe ka urdhëruar përgatitje për një përballje të zgjatur, ka raportuar Anadoly.
Operacioni nisi zyrtarisht më 18 maj me një avancim të koordinuar të forcave tokësore nga disa drejtime. Gjatë javës së kaluar, janë vendosur në Gaza Divizionet 98 dhe 162, të cilat tani i janë bashkuar divizioneve ekzistuese 252, 143 dhe 36.
Burime ushtarake të cituara nga KAN deklaruan se ofensiva po përqendrohet në dy zona kryesore: Gazën veriore dhe Khan Younis në jug. Sipas të njëjtave burime, popullsia civile në këto zona ishte paralajmëruar rreth një javë përpara për të evakuuar, në prag të bombardimeve të planifikuara ajrore dhe tokësore.
Megjithatë, sipas Organizatës Ndërkombëtare për Migrim (IOM), më shumë se 172,000 palestinezë janë zhvendosur në vetëm një javë, duke e shtuar numrin e përgjithshëm të të zhvendosurve në nivel alarmant.
Banorët e Gazës raportojnë se të zhvendosurit nuk janë të sigurt as gjatë evakuimit, pasi shpesh bëhen shënjestër e sulmeve izraelite në rrugët e largimit dhe në zonat ku strehohen përkohësisht, çka ka rezultuar në shumë viktima.
Zyrtarët palestinezë thonë se që nga fillimi i ofensivës më 7 tetor 2023, janë vrarë më shumë se 53,900 njerëz, shumica gra dhe fëmijë, ndërsa qindra mijëra të tjerë jetojnë në kushte çnjerëzore për shkak të shkatërrimeve dhe rrethimit të vazhdueshëm.
Përkundër thirrjeve të vazhdueshme ndërkombëtare për armëpushim, Izraeli ka refuzuar të ndalojë ofensivën, duke thelluar krizën humanitare në territor.
Ushtria izraelite ka paralajmëruar se planifikon të qëndrojë në zonat që pushton, duke sinjalizuar një përfshirje afatgjatë në Gazë dhe një shtim të mëtejshëm të dhunës.
