Të paktën 98 palestinezë u vranë nga sulmet izraelite në Rripin e Gazës gjatë 24 orëve të fundit, bëri të ditur të enjten një zyrtar i Ministrisë së Shëndetësisë në territorin e rrethuar.
Drejtori i përgjithshëm i ministrisë, Munir al-Bursh, tha për agjencinë Anadolu se mes viktimave kishte një numër të madh grash dhe fëmijësh. Sipas tij, sulmet goditën shtëpi dhe tenda që strehonin civilë të zhvendosur, duke shkaktuar viktima në të gjithë enklavën tashmë të shkatërruar nga lufta.
Në të njëjtën kohë, Ministria e Shëndetësisë publikoi të dhëna tronditëse për numrin e fëmijëve të vrarë që nga fillimi i ofensivës izraelite në tetor të vitit 2023. Sipas raportit, 16,503 fëmijë kanë humbur jetën në sulmet izraelite në Gaza gjatë kësaj periudhe, raporton Anadoly.
Të dhënat e ministrisë tregojnë se mes fëmijëve të vrarë janë:
916 foshnja nën moshën një vjeç
4,365 fëmijë të moshës 1 deri në 5 vjeç
6,101 fëmijë të moshës 6 deri në 12 vjeç
5,124 adoleshentë të moshës 13 deri në 17 vjeç
Ministria theksoi se shifra e lartë e viktimave në mesin e fëmijëve “pasqyron shkallën e shënjestrimit të drejtpërdrejtë dhe sistematik të grupit më të pambrojtur dhe më të pafajshëm të Gazës”.
Pavarësisht thirrjeve ndërkombëtare për armëpushim, Izraeli ka vazhduar ofensivën e tij ushtarake në Gaza që nga tetori i vitit të kaluar, e cila deri më tani ka shkaktuar rreth 53,700 viktima palestineze, shumica prej tyre gra dhe fëmijë.
Në nëntor 2024, Gjykata Ndërkombëtare Penale (GJNP) lëshoi urdhër-arreste për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, duke i akuzuar për krime lufte dhe krime kundër njerëzimit të kryera gjatë fushatës ushtarake në Gaza.
Ndërsa situata humanitare vazhdon të përkeqësohet, organizatat ndërkombëtare paralajmërojnë për pasojat katastrofike nëse nuk arrihet një ndërprerje e menjëhershme e luftimeve dhe një zgjidhje për ndihmën humanitare në Gaza.
