Shpëlarja e parave përmes ndërtimeve banesore në Kosovë, ka përfunduar nën llupën e Prokurorisë Speciale.
Në vetëm një rast, të njohur si “Mati”, vlera e pasurisë që u sekuestrua me urdhër të Seciales, tejkalon shifrën e dy milionë eurove. Aty përfshihen 20 njësi banesore, dy lokale afariste 17 garazhe dhe gjashtë depo.
Si rezultat i hetimeve, tre persona përfunduan nën pranga. Ky rast, mblodhi të mërkurën në një takim disa prokurorë e hetues.
Përpara takimit, kryeprokurori i Prokurorisë Speciale, Blerim Isufaj, tregoi se vlera e pasurisë së sekuestruar ka shkuar në afro shtatë milionë euro.
“Qëllimi i këtij takimi është shënjestrimi i një rasti. Pra, bëhet fjalë për takimin e ekipit për shënjestrimin e rasteve, bëhet fjalë për një rast që është kogja me interes, kemi të bëjmë me sekuestrim të pasurisë që vlera e saj shkon deri diku shtatë milionë euro. Ne si Prokurori Speciale jemi të përkushtuar që të luftojmë krimin e të gjitha formave, por në veçanti jemi të përkushtuar që të gjurmojmë pasurinë e fituar në mënyrë të kundërligjshme”, ka thënë Isufaj.
Numri i personave të përfshirë, Prokuroria njofton se tashmë ka shkuar në katër.
Që të gjithë dyshohen për “shpëlarje të parave”, “mashtrim”, “falsifikim të dokumenteve” dhe armëmbajtje pa leje.
Pas përfundimit të takimit, në një komunikatë për media u konfirmua se një pjesë e konsiderueshme e pasurisë është ngrirë.
“Vlera totale e pasurisë së ngrirë dhe sekuestruar është 6,924,656.00 €. Ndër asetet e ngrira dhe të sekuestruara janë 59 banesa, 12 parcela në lokacione të ndryshime dhe 5 llogari bankare”, është paraqitur në grafikë.
Hetimet për këtë rast, janë duke vazhduar ende.
