Mbretëria e Bashkuar pezulloi të martën bisedimet për një marrëveshje tregtare me Izraelin dhe vendosi sanksione ndaj kolonëve izraelitë në Bregun Perëndimor, si përgjigje ndaj ofensivës së re ushtarake në Gaza dhe bllokadës së ndihmave që ka shkaktuar krizë urie.
Sekretari i Jashtëm britanik, David Lammy, tha se Britania nuk mund të vazhdojë bashkëpunimin tregtar me një qeveri që ndjek politika “të pambrojtshme” në Gaza dhe Bregun Perëndimor.
Ai dënoi bllokimin e ndihmave dhe shpërfilljen e paralajmërimeve nga aleatët, duke theksuar se “historia do t’i gjykojë”.
Ambasadorja izraelite në Londër, Tzipi Hotovely, u thirr në Ministrinë e Jashtme, ku bllokada 11-javore u quajt “mizore”.
Ndërkohë, BE-ja po shqyrton një marrëveshje tregtare me Izraelin për shkak të zhvillimeve në Gaza.
Mbretëria e Bashkuar vendosi sanksione ndaj tre individëve, dy qendrave të kolonëve dhe dy organizatave që mbështesin dhunën ndaj palestinezëve, raporton AP.
Ndërkohë, disa deputetë britanikë kërkuan masa më të forta, si sanksione ekonomike ndaj Izraelit dhe njohjen e shtetit palestinez.
Një grusht anëtarësh bërtitën që ai t’i quante veprimet e Izraelit “gjenocid”, megjithëse Lammy e etiketoi atë “ekstremizëm” dhe “monstruoz”.
Kryeministri britanik Keir Starmer i quajti vuajtjet e fëmijëve në Gaza “të patolerueshme” dhe bëri thirrje për një armëpushim.
