Presidenti Donald Trump njoftoi të hënën se Rusia dhe Ukraina pritet të fillojnë “menjëherë” negociatat për një armëpushim, pas bisedave të ndara telefonike me udhëheqësit e të dy vendeve.
Ndonëse bisedimet nuk duket se kanë sjellë ndonjë përparim të madh, Trump u shpreh optimist për mundësinë e arritjes së një marrëveshjeje.
Ende nuk është e qartë se kur apo ku do të zhvillohen negociatat, apo kush do të marrë pjesë në to, raporton AP.
Megjithatë, njoftimi i Trump vjen pak ditë pas takimit të parë të drejtpërdrejtë mes delegacioneve ruse dhe ukrainase që nga viti 2022.
Bisedimet e zhvilluara të premten në Turqi përfunduan me një shkëmbim të kufizuar të të burgosurve, por nuk sollën ndonjë ndërprerje të luftimeve.
Shtëpia e Bardhë bëri të ditur se presidenti Trump ishte i “frustruar” me të dy udhëheqësit për shkak të konfliktit të vazhdueshëm. Zëvendëspresidenti JD Vance deklaroi se Trump kishte në plan t’i bënte presion presidentit rus Vladimir Putin për të përcaktuar nëse ai ishte vërtet i interesuar për të ndaluar luftën. Në të kundërt, SHBA-të do të konsideronin tërheqjen nga përpjekjet për të ndërmjetësuar paqen.
“Unë besoj se Putini është serioz në dëshirën e tij për paqe,” tha Trump në një postim në rrjetet sociale pas bisedës me liderin rus, të cilën e përshkroi si “të shkëlqyer”. Ai shtoi: “Nëse nuk do të ishte e tillë, do ta thoja tani, jo më vonë.”
Gjatë një deklarate për gazetarët në Zyrën Ovale, Trump theksoi se procesi i negociatave është i ndërlikuar për shkak të “egove të mëdha” që përfshihen në të.
“Por mendoj se diçka do të ndodhë dhe, nëse jo, unë thjesht do të tërhiqem dhe ata duhet të vazhdojnë,” tha ai. “Kjo ishte një situatë evropiane. Duhet të kishte mbetur një situatë evropiane.”
Sipas presidentit, bisedat do të jenë përgjegjësi e drejtpërdrejtë e dy palëve. “Kushtet do të negociohen prej tyre, siç është e drejtë. Vetëm ata i dinë të gjitha detajet që të tjerët nuk i njohin.”
Trump përmendi gjithashtu se gjatë bisedës i kishte thënë Putinit: “Duhet të fillojmë punën.”
Që prej rikthimit të tij në Shtëpinë e Bardhë, Trump është përballur me presion për të përmbushur premtimin e tij për të zgjidhur shpejt luftën mes Rusisë dhe Ukrainës — një konflikt që nisi me pushtimin rus në shkurt të vitit 2022 dhe që ende vazhdon pa zgjidhje të qartë në horizont.
