Prokuroria Speciale e Republikës së Kosovës ka bërë të ditur se është në fazën përfundimtare të hetimeve në lidhje me masakrën e Dubravës, një nga krimet më të rënda të luftës në Kosovë.
Zëdhënësja e Prokurorisë Speciale, Nora Luta ka thënë se që nga kalimi i kompetencave nga EULEX-i, Prokuroria ka trajtuar këtë rast me prioritet të lartë dhe hetimet janë zhvilluar në dy drejtime.
“Në Departamentin Special të Gjykatës Themelore në Prishtinë, tashmë është duke u zhvilluar procesi gjyqësor ndaj Gavrilo Milosavleviqit. Ndërsa në rastin tjetër, ndaj të gjithë të pandehurve, jemi në përfundim të hetimeve. Në këtë fazë kemi arritur t’i identifikojmë rreth 88 të pandehur dhe të intervistojmë mbi 400 dëshmitarë”, ka thënë ajo.
Sipas Lutes, deri më tani ka qenë e pamundur të ngrihet një aktakuzë për të gjithë të dyshuarit, pasi Kodi i mëparshëm i Procedurës Penale nuk e ka mundësuar gjykimin në mungesë.
“Ndërsa gjykimi ndaj Milosavleviqit, i cili ndodhet në masën e paraburgimit, pritet të përfundojë brenda këtij muaji”, ka njoftuar ajo.
