Misionari 69-vjeçar augustinian, Papa Leo XIV, hapi zyrtarisht pontifikatin e tij të dielën në një ceremoni solemne në Sheshin e Shën Pjetrit, duke u bërë papa i parë amerikan në historinë e Kishës Katolike.
Me një mesazh të qartë bashkimi dhe paqeje, ai u zotua të shërbejë si “shërbëtor i besimtarëve” dhe të punojë për një kishë të bashkuar në një botë gjithnjë e më të ndarë.
Para dhjetëra mijëra pelegrinësh, liderësh botërorë, patriarkësh dhe princash, Leo XIV kryesoi Meshën inauguruese që përfshinte lutje, muzikë, lexim nga Ungjilli dhe kungim, si çdo Meshë të dielë në mbarë botën, por e ngarkuar me simbole dhe mesazhe të fuqishme.
Në homelinë e tij, ai tha:
“Do të doja që dëshira jonë e parë e madhe të ishte një kishë e bashkuar, një shenjë uniteti dhe bashkësie, e cila bëhet maja për një botë të pajtuar.”
Ungjilli u lexua fillimisht në latinisht dhe më pas në greqisht — një shenjë e qartë e përpjekjes për të përfaqësuar Kishën universale. Në altar, ishte vendosur një ikonë e Zojës së Këshillës së Mirë, nga një fshat pranë Romës ku shërbejnë augustinianët, urdhri fetar i Leo XIV.
Papa u duk emocionalisht i prekur kur iu vendosën dy simbolet e papatit: palliumi mbi shpatulla dhe unaza e peshkatarit në dorë.
Ceremonia nisi me turin tradicional nëpër shesh me papamobile, një gjest që ndërthur traditën me ndikimin mediatik modern të papatit.
Leo XIV përshëndeti turmën nga pjesa e pasme e makinës, por ndryshe nga pararendësit e tij, nuk u ndal për të përqafuar fëmijët, një ndryshim i vogël por domethënës në stil, raporton AP.
Protokolli diplomatik ishte i kujdesshëm: për shkak të shtetësisë së tij të dyfishtë amerikane dhe peruviane, SHBA dhe Peruja morën vendet e para në rresht. Mes figurave të pranishme ishin Sekretari Amerikan i Shtetit Marco Rubio dhe senatori J.D. Vance, të cilët kishin ardhur edhe për të diskutuar përpjekjet për paqen mes Rusisë dhe Ukrainës.a
