Presidentja e vendit, Vjosa Osmani tha se Bashkimi Evropian duhet të heq masat ndaj Kosovës.
Osmani u deklarua kur mbërriti në Samitin e Komunitetit Politik Evropian që po mbahet në kryeqytetin e Shqipërisë.
Presidentja Osmani theksoi se Kosova është në linjë me Bashkimin Evropian.
Në Samitin e Tiranës po marrin pjesë 47 liderë evropianë.
“Më parë duhet të flasim për heqjen e masave nga ana e BE-së, sepse kjo e dëmton edhe vetë kredibilitetin e BE-së”, ka thënë Osmani para gazetarëve në Tiranë.
“Këtë e kam kërkuar edhe mbrëmë gjatë darkës së organizuar nga ana e BE-së, dhe do ta kërkoj edhe sot, sepse kjo do t’i jepte kredibilitet dialogut. Kosova, e cila është e linjëzuar 100% me politikën e jashtme dhe të sigurisë me BE-në, akoma është nën masa të padrejta përkundër faktit që edhe vetë BE-ja ka konstatuar se i ka plotësuar të gjitha. Për fat të keq, për disa arsyetime politike të disa shteteve anëtare ato janë akoma në fuqi, duke dëmtuar kështu rrugën europiane të Kosovës, duke dëmtuar interesat e qytetarëve tonë pa dallim dhe po ashtu duke e dëmtuar edhe vetë kredibilitetin e BE-së. Megjithatë, jemi këtu për të ngritur zërin për Kosovën europiane që nuk shikon rrugë tjetër pos BE-së me shpresën që do të rritet mirëkuptimi mes shteteve anëtare dhe të hiqen pengesat e fundit”, ka thënë Osmani.
