Rasti i “53 milionëshit” e ka sjellur Pal Lekajn sërish në gjykatë.
Për ish-ministrin e infrastrukturës, dhe ish-zyrtarët e tjerë të ministrisë, Eset Berisha, Nebih Shatri dhe Besim Tahiri, sot nisi rigjykimi në këtë rast.
Kjo pasi Gjykata e Apelit e rrëzoi aktgjykimin e Themelores së Prishtinës, që të gjithë së bashku i dënoi me 10 vjet e tre muaj burgim, në janarin e vitit 2024.
Gjykimi u përball me ndërprerje të procesit, që në seancën e parë.
Kjo për shkak se mbrojtja e të akuzuarit Eset Berisha, kërkoi që kryetarja e trupit gjykues të përjashtohet.
“Kryetarja e trupit gjykues gjatë shqyrtimit paraprak duke ushtruar detyrën e kryetares së trupit gjykues në lëndën, jo vetëm që nuk e ka zbatuar nenin 7, paragrafi 2 të KPPK-së, i cili e detyron që me ndërgjegje dhe përkushtim maksimal të vërtetoj faktet, provat fajësuese si dhe ato shfajësuese. Por në arsyetimin e vendimit, e ka bërë shtrembërimin dhe manipulimin e provave personale dhe material”, tha Teutw Xhema, avokate e Eset Berishës.
Për këtë kërkesë, do të vendos kryetarja e gjykatës.
“Trupi gjykues merr aktvendim, ndërpritet seanca e sotme. Kërkesa e njëjtë do t’i dërgohet kryetares së Gjykatës Themelore në Prishtinë, për vlerësim dhe shqyrtim”, u shpreh Violeta Namani- kryetare e trupit gjykues.
Lekaj, Berisha, Shatri dhe Tahiri, po akuzohen për ndarjen e kundërligjshme të shumës prej 53 milionë euro për konsorciumin Bechtel-Enka, për ndërtimin e autostradës Prishtinë – Han i Elezit.
Rasti është kthyer në rigjykim në shkurt të këtij viti, pas ankesave të mbrojtjes së të akuzuarve për shkelje esenciale të procedurës, vërtetim të gabuar dhe jo të plotë të gjendjes faktike.
