Ministri në detyrë, Faton Peci ka deklaruar se përgjigjja e tij për ftesën e presidentes së Kosovës, Vjosa Osmani për takim gjithëpërfshirës me partitë politike është nxjerrë jashtë kontekstit.
Peci në një prononcim për media pas deshtimit të 14-të të seancës konstituive të Kuvendit ka mohuar të ketë thënë se Osmani mund të ofrojë ftesa koti.
Sipas tij ai është shprehur se di një vullnet pozitiv të grupit të tyre për të marrë pjesë dhe se është e rëndësishme edhe përmbajtja e një ftese të tillë.
“Mendoj që kjo është çështje është nxjerrur jashtë kontekstit, e para. E dyta, nuk kam thënë unë që presidentja mundet me ofru ftesa koti. Mbetet të shohim në rast se do të ketë ftesë të tillë ose jo. Unë kam thënë që di një vullnet pozitiv të grupit tonë për të marrë pjesë edhe është e rëndësishme edhe përmbajtja se çka përmban një ftesë e tillë. Kur ta shohim ftesën do të ketë përgjigje adekuate”, ka thënë Peci.
Ndryshe, të enjten u njoftua se presidentja e Kosovës, Vjosa Osmani, do t’i kontaktojë së shpejti partitë politike, për të parë se cila është koha e përshtatshme për të gjithë, për një takim gjithëpërfshirës.
Për këtë takim janë deklaruar deputetët Donika Gërvalla dhe Faton Peci, nga Lista Guxo lidhur me atë nëse do të merrnin pjesë në një takim të tillë.
Peci ka thënë se me rëndësi është se si do të jetë përmbajtja e ftesës.
“Institucioni i presidentit është institucion mbi partiak dhe nuk vihet aty kushte se kush merr pjesë ose kush nuk merr…. Përveç ftesës është e rëndësishme edhe përmbajtja”, deklaroi Peci.
E pas këtyre deklaratave të Pecit dhe Gërvalles ka reaguar edhe Presidenca.
Këshilltari për media i Osmanit, Bekim Kupina ndër të tjera ka thënë se nëse është dikush në Kosovë që e di shumë mirë që Presidentja nuk bën ftesa kot e as nuk shkruan përmbajtje kot të ftesave, janë pikërisht Peci dhe Gërvalla.
“Nëse është dikush në Kosovë që e di shumë mirë që Presidentja nuk bën ftesa kot e as nuk shkruan përmbajtje kot të ftesave, janë pikërisht z.Peci dhe znj.Gërvalla. Poashtu, nëse është dikush që e di fort mirë që Presidentja e njeh tepër mirë edhe Kushtetutën e vendit e edhe kompetencat e saj, janë pikërisht këta dy. Unë nuk e di nëse ata kanë folur në emër të Lëvizjes Vetëvendosje kur kanë paraqitur sot kushte të tilla, sepse siç e dini edhe ju, z.Kurti i përgjigjej pozitivisht edhe ftesave të Presidentit Thaçi e edhe ftesave të Presidentes Jahjaga (kur kemi pasur një situatë të ngjashme në vitin 2014), prandaj mospërgjigja në ftesën e Presidentes Osmani në një situatë kur vendi po përballet me një bllokadë të rëndë nga e cila pësojnë qytetarët, do të ishte e paprecedentë. Ftesa do të jetë ftesë për takim, pra nuk do të ketë ndonjë filozofi aty. Nuk është koha për hipokrizi por për të treguar nivelin më të lartë të përgjegjësisë shtetërore, sepse qytetarët meritojnë seriozitet maksimal për tema të interesit nacional”, tha ai.
