Nol Nushi nga Partia Socialdemokrate e ka quajtur taktizim të Lidhjes Demokratike të Kosovës propozimin e saj për një qeveri tranzitore dhe unifikuese.
Nushi ka thënë se aktualisht ndodhemi në fushën e taktizimeve pasi sipas tij secili subjekt politik po shikon ta ruajë pozicionin partikular pa ndonjë interes specifik për ta krijuar një qeveri më të mirë për Kosovën.
“Për besë kjo më shumë mu duk si taktizim sepse tashmë jeni në fushën e shumë taktizimeve ku një taktizimi të një subjekti po I përgjigjen me një taktizim subjektet e tjera pra secila në mes vete duke shikuar ta ruajë pozicionin e vet partikular dhe pa interes specifik për me I sjellë Kosovës një qeveri më të mirë”, ka deklaruar Nushi në emisionin “Ditari” në Tëvë1.
Ai është shprehur skeptik se një propozim i tillë do të jetësohet pasi për të është I pamundur për shkak të raporteve dhe historikut të partive politike mes vete.
“Unë kam dilema që ky propozim do të marrë jetë sepse është pothuajse i pamundur të zhvillohet edhe për shkak të raporteve dhe historikut të subjekteve politike mirëpo është njëkohësisht edhe i çuditshëm sepse pas gjitha akuzave që ia ke bërë partisë në pushtet e cila të ftoi në koalicion ti po i përgjigjesh me një jo për koalicion dhe me një ftesë për një koalicion më të gjerë”, ka thënë ai.
Ndryshe, kryetari i Lidhjes Demokratike të Kosovës, Lumir Abdixhiku të martën i është përgjigjur negativisht letrës së Kurtit duke e vlerësuar të pamundur bashkëpunimin me të. Mirëpo, Abdixhiku ka propozuar krijimin e një qeverie tranzicioni, si opsion për dalje nga ngërçi institucional./teve1.info/
