Këngëtarja, Lady Gaga, e veshur me një fustan të kuq të ndezur, “elektrizoi” turmat në plazhin Copacabana të Rio de Janeiro-s me koncertin e saj falas dhe që tërhoqi rreth 2.1 milion njerëz.
Pasi hapi shfaqjen e saj me “Bloody Mary”, ylli amerikan, i cili nuk kishte performuar në Brazil që nga viti 2012, vazhdoi me “Abracadabra”, një nga hitet e albumit të saj të fundit, “Mayhem”, i publikuar në muajin mars.
“Sonte ne po bëjmë histori, por askush nuk e bën historinë i vetëm. Pa të gjithë ju, njerëzit e jashtëzakonshëm të Brazilit, nuk do ta kisha këtë moment. Faleminderit që keni bërë historinë me mua! Populli i Brazilit është arsyeja që unë shkëlqej sot. Por, nga të gjitha gjërat për të cilat mund t’ju falënderoj, ajo për të cilën jam më mirënjohëse është kjo: që më keni pritur. Ju keni pritur më shumë se 10 vjet për mua”, tha ajo.
Artistja deklaroi se u desh kaq shumë kohë për t’u rikthyer sepse po “shërohej” e “po bëhej më e fortë”.
Sensacioni i popit anuloi shumë nga shfaqjet e saj në vitet 2017 e 2018 për shkak të fibromialgjisë, që është një gjendje mjekësore e karakterizuar nga dhimbje kronike e përhapur në të gjithë trupin e nga një përgjigje e mbindjeshme e dhimbjes kundrejt presionit.
Vlerësohet se shfaqja e Gaga-s do të ketë injektuar rreth 600 milion reais (79.9 milion paund) në ekonomi, gati 30% më shumë se shfaqja e Madonna-s.
Gjatë gjithë javës, fansat e Lady Gaga-s janë dyndur në qytet, për të mos humbur mundësinë.
Këshilli Bashkiak i qytetit të Rios po mbështetet në këtë kthesë ekonomike, gati 30% më shumë se koncerti falas i Madonnës i mbajtur në të njëjtin vend, një vit më parë.
Autoritetet lokale synojnë që të vazhdojnë traditën e koncertit falas në muajin maj, për të stimuluar turizmin në një periudhë që konsiderohet sezon me jo shumë vizitorë.
Kryebashkiaku Eduardo Paes ka lënë të kuptohet tashmë se po shqyrton mundësinë e ftesës ndaj grupit irlandez të rokut U2, vitin e ardhshëm.
Koncerti i Lady Gaga-s u ndoq nga një grup i madh sigurie, me mbi 5 mijë oficerë, dronë e kamera sigurie të teknologjisë së lartë, që bëjnë identifikimin e fytyrës./TAR
