Në njoftimin e Qeverisë thuhet se kryeministri Albin Kurti e kishte pritur në vizitë në Kosovë senatorin Murphy në prill të këtij viti dhe se tani në Washington D.C., ata vazhduan diskutimet për tema dhe çështje që kremtojnë por edhe synojnë avancimin e mëtejmë të marrëdhënieve të veçanta ndërmjet vendeve tona.
“Kryeministri Kurti e njoftoi senatorin Murphy për vendimin e fundit të Qeverisë për vendosjen e sanksioneve shtesë dhe në përputhje me paketën e sanksioneve të Shteteve të Bashkuara të Amerikës dhe Bashkimit Evropian ndaj Federatës Ruse. Duke folur për vizitën e tij atje, kryeministri Kurti foli edhe për takimet me investitorë potencialë, me theks te ata të fushës së Teknologjisë së Informacionit”, thuhet në njoftim.
Më tej në njoftim thuhet se senatori Murphy ka thënë se vizita e Kurtit në ShBA dhe takimet e shumta janë rikujtim i marrëdhënieve të pathyeshme ndërmjet Shteteve të Bashkuara të Amerikës dhe Kosovës.
“Ai gjithashtu e njoftoi kryeministrin se reputacioni i Kosovës në sektorin e teknologjisë së informacionit është në rritje e sipër dhe ka cituar interesimin e kompanive të këtij sektori për të investuar në Kosovë”, thuhet në njoftim. /teve1.info/
