Të paqarta mbesin arsyet pse anëtarët e Bordit për trajtim jashtë institucioneve shëndetësore publike, ia paraqitën dorëheqjen ministrit të Shëndetësisë. Televizioni gjatë ditës ka kontaktuar si me kryesuesen e Bordit dhe anëtarët e tjerë, ashtu edhe me Ministrinë e Shëndetsisë, por ata nuk i kanë treguar arsyet e dorëheqjes së bordit.
Nga Ministria e Shëndetësisë, përmes një përgjigje elektronike, thanë se kërkesën për dorëheqje do ta shqyrtojë ministri Rifat Latifi, me t’u kthyer nga ShBA-ja.
“Ministri i Shëndetësisë, Rifat Latifi, ka pranuar një email nga kryesuesja e Bordit sa i përket kërkesës për dorëheqjen e Bordit për Trajtim jashtë Institucioneve Shëndetësore Publike. Ju njoftojmë që kërkesa në fjalë do të shqyrtohet gjatë javës së ardhshme pas kthimit të ministrit Latifi nga vizita zyrtare në SHBA”, tha Lumturije Bekaj, këshilltare e ministrit Rifat Latifi.
Përderisa arsyet e dorëheqjes së anëtarëve të bordit nuk dihen, Kosova vazhdon t’i mbetet borxh institucioneve private shëndetësore ku qytetarët po kërkojnë shërim.
Në një përgjigje për televizionin Fondi për Sigurime Shëndetësore ka thënë se 770 mijë është vlera e lëndëve të gatshme për pagesë teksa për afër 10 milion euro janë sjellur faturat për shërbimet e ofruara.
Nga fondi thanë se që nga fillimi i vitit për shërim jashtë vendit janë bërë 467 aplikime kurse shuma e shpenzuar është mbi 2 milionë euro.
“Në vitin 2022 (deri sot) kanë aplikuar 467 raste ndërkaq shuma e shpenzuar deri tani (2022) është 2,132,353.75€. Mjetet në dispozicion deri në fund të vitit 2022 janë: 5,137,646.25€”, thuhet nw përgjigjen e fondi për Sigurime Shëndetësore.
Bordi që dha dorëheqje të mërkurën udhëhiqej nga Kadrie Sherifi, kryesuese dhe anëtarët Arben Grazhdani, Vildane Goga, Fakete Haziri dhe Semra Mecihan.
Raporti i gazetarit Gojart Jashari.
