Dronët rusë kanë goditur portin ukrainas të Odesës në një sulm gjatë natës, më pak se 24 orë pas përfundimit të armëpushimit të supozuar të Pashkëve të shpallur njëanshëm nga Moska, dukë lënë të plagosur të paktën tre persona, thanë autoritetet lokale të martën.
Gjithashtu, gjatë ditës së martë, Rusia goditi qytetin jugor të Ukrainës, Zaporizhia, me dy bomba masive ajrore. Sulmi vrau një grua 69-vjeçare dhe plagosi 22 persona, duke përfshirë tre fëmijë, sipas guvernatorit rajonal Ivan Fedorov, raporton AP.
Trump tha javën e kaluar se negociatat po “vinin në krye” dhe këmbënguli se asnjëra palë nuk po “luan” me atë në përpjekjen e tij për t’i dhënë fund luftës së rëndë.
Kjo erdhi pasi Sekretari i Shtetit, Marco Rubio sugjeroi javën e kaluar se SHBA së shpejti mund të tërhiqen plotësisht nga negociatat nëse nuk përparojnë. Ai foli në Paris pasi bisedimet mes zyrtarëve amerikanë, ukrainas dhe evropianë prodhuan skica për hapat drejt paqes dhe dukej se kishte bërë një përparim të shumëpritur.
Një takim i ri pritet të mërkurën në Londër dhe Rubio sugjeroi se mund të jetë vendimtar në përcaktimin nëse administrata Trump vazhdon përfshirjen e saj.
Zelenskyy tha të hënën se Ukraina ishte e gatshme për çdo formë diskutimi për t’i dhënë fund sulmeve ndaj objekteve civile, të cilat përfshijnë ujin, transportin, energjinë elektrike dhe sistemet e komunikimit, raporton The Guardian.
“Ukraina e mban propozimin e saj për të mos goditur të paktën objektivat civile. Dhe ne presim një përgjigje të qartë nga Moska,” tha ai. “Ne jemi të gatshëm për çdo bisedë se si ta arrijmë këtë.”
Kurse presidenti rus, Vladimir Putin i tha televizionit shtetëror dje se Moska ka një “qëndrim pozitiv ndaj çdo nisme paqeje”, duke shtuar se ai shpreson që Volodymyr Zelenskyy dhe zyrtarët ukrainas “të ndjehen në të njëjtën mënyrë”.
Zëdhënësi i Kremlinit Dmitry Peskov tha se komentet e Putinit treguan një hapje për t’u angazhuar në bisedime të drejtpërdrejta me Kievin.
Nuk ka pasur bisedime të drejtpërdrejta midis Kievit dhe Moskës që kur Rusia nisi pushtimin e saj në shkallë të plotë të Ukrainës në shkurt 2022.
