Universiteti i Harvardit ka njoftuar të hënën se ka ngritur padi për të ndaluar një ngrirje federale për më shumë se 2.2 miliardë dollarë grante.
Administrata Trump kishte bërë thirrje për reforma të qeverisë dhe udhëheqjes në universitet dhe ndryshime në politikat e pranimit.
Administrata ka argumentuar se universitetet lejuan që antisemitizmi të mos kontrollohej në protestat e kampusit vitin e kaluar kundër luftës së Izraelit në Gaza.
Presidenti i Harvardit, Alan Garber refuzoi kërkesat dhe disa orë më vonë, qeveriu ngriu miliarda dollarë financime federale.
“Qeveria nuk ka – dhe nuk mund – të identifikojë ndonjë lidhje racionale midis shqetësimeve të antisemitizmit dhe kërkimeve mjekësore, shkencore, teknologjike dhe të tjera që ka ngrirë që synojnë të shpëtojnë jetë amerikane, të nxisin suksesin amerikan, të ruajnë sigurinë amerikane dhe të ruajnë pozicionin e Amerikës si një lider global në inovacion”, thuhet në padinë e paraqitur në gjykatën federale të Bostonit, raporton AP.
Padia e Harvardit e quajti ngrirjen e fondeve “arbitrare dhe kapriçioze”, duke thënë se ajo shkelte të drejtat e Amendamentit të Parë dhe dispozitat statutore të Titullit VI të Aktit të të Drejtave Civile.
Për administratën Trump, Harvardi paraqet pengesën e parë të madhe në përpjekjen e tij për të detyruar ndryshime në universitete që republikanët thonë se janë bërë vatra të liberalizmit dhe antisemitizmit.
Në letrën e saj në fillim të këtij muaji, administrata i tha Harvardit të impononte disiplinë më të ashpër ndaj protestuesve dhe të kontrollonte studentët ndërkombëtarë për ata që janë “armiqësorë ndaj vlerave amerikane”.
Ai bëri thirrje gjithashtu për reforma të gjera drejtuese në universitet, ndryshime të politikave të pranimeve dhe përfundimin e njohjes së kolegjeve për disa klube studentore.
Të hënën e kaluar, Harvardi tha se nuk do të pajtohej, duke përmendur Amendamentin e Parë. Të nesërmen, Trump foli në platformën e tij “Truth Social”, duke pyetur nëse universiteti duhet të humbasë statusin e tij të përjashtimit nga taksat “nëse vazhdon të shtyjë/mbështesë “Sëmundjen” politike, ideologjike dhe terroriste?
Padia pason një padi të paraqitur në fillim të këtij muaji nga Shoqata Amerikane e Profesorëve të Universitetit që kërkon që një gjykatës federal të shpallet të paligjshme dhe të lërë mënjanë një shqyrtim dhe hetim në pritje të financimit të Harvardit.
