Pavarësisht protestave e kundërshtimeve, ZRrE-ja mori vendim që qytetarët të paguajnë më shtrenjtë energjinë elektrike mesatarisht për 16.1 për qind.
Vendimi për shtrenjtimin e rrymës përgjatë katër viteve, u mor për tri herë.
Por, çka pas këtij vendimi?
Gazetari, Mirlind Behluli, thotë se ky vendim i Zyrës së Rregullatorit për Energji duhet të dërgohet në Gjykatën Themelore të Prishtinës.
Sipas tij, kjo Gjykatë do të shqyrtojë dhe do të vë një masë sigurie që siç thotë do të vlejë për gjashtë muaj.
“Tash e tutje, çfarë duhet me ndodhë është një padi në Gjykatë edhe një masë të sigurisë për këtë vendim, besoj që Gjykata Themelore e Prishtinës do ta shqyrtojë këtë shumë shpejtë dhe kurdo që të bëhet padia do ta vë një masë të sigurisë minimalisht për gjashtë muaj”, tha ai në emisionin “Këndi i Debatit” në Tëvë1.
Behluli, vlerëson se protestat dhe thirrjet për kundërshtimin e vendimit kanë pasur mangësi.
Ai thekson se protestat duhet me qenë masovike, e gjithashtu edhe Qeveria e Kosovës të ketë një qëndrim politik.
“Ne duhet të diskutojmë se pse s’kemi kapacitete të reja të mjaftueshme që do t’i ndihmonin KEK-ut në prodhimin me termocentrale. Protestat mendoj që kanë me qenë masovike. Ndonëse ka një kauzë autentike, nuk ka ndonjë organizator të mirëfilltë që do t’i organizonte këto turme, që këta qindra njerëz me u bë në mijëra. Duhet me pasë protesta edhe më të mëdha. Gjithashtu duhet me pasë edhe një qëndrim politik edhe nga Qeveria e Kosovës, cilado qoftë ajo në të ardhmen”, deklaroi ai.
Ndërkohë, në mbledhjes e Bordit të ZRRE-së nuk është treguar se sa do të jetë rritja e çmimit të rrymës, porse janë publikuar vetëm shifrat e të hyrave maksimale dhe të cilat janë më të larta sesa në vitin 2024./teve1.info/
