Një grua e moshuar, e njohur vetëm me inicialet R.M., ka ndërruar jetë më 8 prill në një spital në Beograd si pasojë e plagëve të marra nga një aksident i rëndë trafiku, të cilin e shkaktoi sigurimi personal i terroristit serb Milan Radoiçiq – një figurë e afërt me pushtetin në Serbi. Ngjarja ka ndodhur më 21 mars në rrugën nga Brusi për në Kopaonik, raportoi fillimisht portali serb Radar.rs.
Sipas të dhënave të siguruara nga Radar, viktima dhe bashkëshorti i saj – një çift i moshuar, djali i të cilëve është një nga drejtuesit e policisë në Beograd – po udhëtonin me një automjet të tipit Lada në korsinë e djathtë, kur një limuzinë e tipit Škoda, pjesë e eskortës së Radoiçiçit, e goditi makinën e tyre gjatë një parakalimi të rrezikshëm.
Aksidenti ndodhi pasi një makinë tjetër, tip “jeep” me targa të huaja, filloi një parakalim të pakontrolluar, i ndjekur menjëherë nga Škoda që u përplas me Ladën. Dy të rinjtë në Škoda, të cilët janë identifikuar si pjesëtarë të sigurimit të Radoiçiçit, nuk pësuan lëndime dhe nuk iu nënshtruan as procedurave standarde hetimore të policisë – një fakt që ngre shqetësime serioze për ndërhyrje politike dhe mosfunksionim të institucioneve.
Çifti i moshuar u dërgua menjëherë në kujdes intensiv. Megjithëse fillimisht mendohej se gjendja më e rëndë ishte ajo e burrit, në ditët në vijim u përkeqësua gjendja e R.M., e cila më pas ndërroi jetë si pasojë e plagëve të marra në aksident.
Institucionet në heshtje, mediat e regjimit në censurë
Ky rast i rëndë është karakterizuar nga heshtja e plotë e institucioneve shtetërore dhe e mediave të kontrolluara nga regjimi i Vuçiçit. Ministria e Brendshme e Serbisë nuk ka dhënë asnjë deklaratë publike lidhur me aksidentin, ndërsa mediat proqeveritare nuk kanë publikuar asnjë njoftim të vetëm për këtë tragjedi, duke konfirmuar edhe një herë standardet e dyfishta të drejtësisë në Serbi, veçanërisht kur bëhet fjalë për figurat e lidhura me krimin dhe pushtetin.
Milan Radoiçiç, i shpallur terrorist nga autoritetet në Kosovë, njihet për lidhjet e tij me strukturat kriminale dhe përfshirjen në operacione destabilizuese në veri të Kosovës, përfshirë edhe organizimin e sulmeve të armatosura ndaj Policisë së Kosovës. Ndaj tij rëndojnë akuza të shumta për terrorizëm, aktivitete kriminale dhe ndikim të paligjshëm në zonat me shumicë serbe.
Ky rast tragjik dhe mënyra se si është trajtuar nga autoritetet serbe, ngre pikëpyetje të mëdha mbi sundimin e ligjit në Serbi dhe mbi mënyrën sesi struktura të lidhura me krimin, si ajo e Radoiçiçit, vazhdojnë të veprojnë me imunitet të plotë institucional.
