“Shteti që s’mbron jetën ka dështuar”, “Për siguri nuk duam fjalë, duam vepra” janë parullat që disa qytetarë mbanin në duar në protestën që është duke u organizuar kundër dhunës dhe vrasjeve në Kosovë.
Kjo protestë ka filluar në orën 14:00 dhe pjesëmarrës janë një numër jo i madhe i qytetarëve.
Kjo protestë sipas shoqatës “Roja e Kohës” organizohet si reagim ndaj ngjarjeve të rënda të fundit që kanë tronditur opinionin publik dhe kanë vënë në pikëpyetje sigurinë e jetës në vend.
“Vrasjet dhe përplasjet me armë janë pasqyrë e një dështimi institucional që nuk mund të kalojë pa përgjegjësi. Kërkojmë ashpërsim të ligjit për armët dhe ndëshkim të ashpër për posedim të paligjshëm, formim të një Reparti Special për Parandalimin e Dhunës në Komunitet, investime urgjente në shëndetin mendor dhe kujdesin psiko-social, edukim qytetar kundër dhunës dhe armëmbajtjes që nga shkollat fillore, kontroll të rreptë të lejeve për armë dhe krijim të një regjistri publik të poseduesve. Koha për veprim është tani. Nuk duam më viktima”, thuhet në njoftim.
