Në përmbyllje të mandatit katër vjeçar, ministrja e drejtësisë, Albulena Haxhiu, listoi disa nga ato që tha se janë të arritura të saj.
Në listë, Haxhiu përfshiu edhe ligjet që ia kontestoi dhe rrëzoi Gjykata Kushtetuese, si Ligji për Byronë për Verifikimin dhe Konfiskimin e Pasurisë së Pajustifikueshme dhe Ligji për KPK-në.
Vullnet Bugaqku nga Instituti Demokratik i Kosovës, thotë se kjo është vazhdimësi e një qasje jo profesionale e udhëheqësve të institucioneve.
“Këto nisma legjislative janë karakterizuar me mungesë të profesionalizmit në hartimin e këtyre dispozitave, gjithashtu një mungesë e transparencës dhe mungesë e bashkëpunimit me faktorin ndërkombëtarë, me zyrën e BE-së dhe shoqërinë civile. Për faktin që nuk është se i kanë marrë për bazë rekomandimet, opinionet dhe vërejtjet e këtyre akterëve. Dhe normalisht që për këtë arsye, ta zëmë ligji për KPK-në ose nismat e tjera janë kontestu vazhdimisht në Gjykatë”, vlerëson ai.
Përgjatë katër viteve, ministria e drejtësisë vlerësohet se la shumë punë pa i përfunduar.
“Ministria e Drejtësisë ka dështuar në tërësi në Avokaturën Shtetërore, për faktin se janë humbur shumë procese dhe kjo i ka kushtuar shtetit tonë shumë dëme materiale. Ministria e Drejtësisë ka dështuar në çkapjen e noterisë, ka dështuar në funksionalitetin e emërimit të noterëve në proporcion me banorët”, thotë avokati Kadri Osaj.
Aktualisht, Gjykata Kushtetuese ka në trajtim ligjin për KPK-në, ligjin për Zyrtarët Publikë, ligji për KPM-në dhe Ligji për Fondin Sovran.
