Dragisha Milenkoviq e ka pranuar para gjykatës së gjatë luftës, të burgosurit e burgut të Prishtinës dhe të Lipjanit, janë keqtrajtuar.
Ish-gardiani që është ulur në bankën e të akuzuarve, të enjten, dha versionin e tij të këtyre ndodhive.
Ai thotë se keqtrajtimet i kanë vërejtur kur të ndaluarit janë sjellur në burg, pasi maltretimet ndodhnin në Sigurimin Shtetëror.
“Pjesa më e madhe e njerëzve, janë maltretuar dhe marrë në pyetje në Sigurimin Shtetëror. Diku 10 % e njerëzve, bile unë të cilët i kam udhëhequr nuk janë maltretuar”, ka deklaruar ai.
Mirëpo, Milenkoviq po e mohon përfshirjen e tij në këto krime.
“Ata njerëz në burg nuk kanë pasur kurfarë problem, e që unë e di. Sepse shefat tanë këtë kurrë nuk do ta lejonin.”
Ish-gardiani foli me detaje për dëmtimet fizike që u bëheshin të burgosurve.
“Të paraburgosurve asnjëherë nuk ua kanë dëmtuar fytyrat. Por vetëm në duar, në këmbë, në pjesë ku mishi është më i trashë”, tha ai.
Përgjatë këtij procesi gjyqësor, Milenkoviq është përballur me shumë ish të burgosur të asaj kohe.
“Kur i kam parë këta persona këtu, i kam njohur 3-4 persona, të tjerët nuk i kam njohur”, ka pohuar ai.
“Si e vlerësoni ushqimin që iu është dhënë të paraburgosurve?”, tha avokati i Milenkoviqit, Dejan Vasiq.
“Disa persona që kanë qenë në UÇK, kanë ardhur me nga 40-50 kg nga mali ku kanë luftuar. Ata e kanë pasur ushqimin e veçantë, sipas udhëzimit të mjekut sepse zorrët i kanë pasur të mbyllura. Dhe nuk kanë guxuar që deri më 7-10 ditë, të marrin ushqim tjetër përpos supës dhe çajit”, tha Milenkoviq.
Milenkoviq ka treguar gjithashtu në burgun e Prishtinës ka punuar deri në vitin 1999, kur është nënshkruar armëpushimi, dhe se dhjetë ditë pas saj, kur është tërhequr ushtria e Serbisë, UNMIK-u ka kërkuar nga ta që ta lironin edhe burgun.
Seanca do të vazhdoj edhe gjatë ditës së nesërme.
