Presidentja Vjosa Osmani është takuar me me homologun e saj nga Letonia, Edgars Rinkevics, ku kërkoi nga Bashkimi Evropian që të ketë përgjigje të qartë karshi qasjes destabilizuese të Serbisë në rajon.
Në konferencën e përbashkët për media, ajo tha se Kosova është e përkushtuar për vlerat euro-atlantike.
“Jemi të përkushtuar thellë për vlera euro-atlantike, parimin e fqinjësisë së mirë gjithmonë duke ruajtur sovranitetin territorial”, tha ajo.
Osmani ka theksuar se Letonia është partnere e fuqishme e Kosovës dhe se e kupton mirë pozicionin e kësaj të fundit.
“Letonia e kupton më së miri pozicionin e Kosovës duke qenë se të dyja vendet e kanë një të kaluar të dhimbshme por edhe kufizohemi me shtete fqinje agresore. Sikur Letonia edhe Kosova jemi për vlerat euroatlantike, parimit të fqinjësisë së mirë”.
Në anën tjetër, Presidenti i Letonisë, Edgars Rinkevics, tha se mbështesin anëtarësimin e Kosovës në organizata ndërkombëtarë dhe veçmas në Këshill të Evropës dhe Bashkim Evropian.
Ai shtoi se diskutuan me presidenten Osmani edhe për avancimin e raporteve bilaterale mes dy vendeve.
Tutje, ai ka deklaruar se Bashkimi Evropian duhet t’i heq masat kufizuese ndaj Kosovës.
“Letonia e mbështet plotësisht integrimin e Kosovës në organizatat ndërkombëtare dhe diskutuam gjegjësisht anëtarësimin në Këshillin e Europës. E keni mbështetjen tonë të plotë. Gjithmonë ju kemi mbështetur për anëtarësimin e plotë aty dhe besojmë që kjo mund ta hapë rrugën edhe për organizatat e tjera ndërkombëtare”, tha ai ndër tjerash.
