Ministri i Administrimit dhe Pushtetit Lokal, Elbert Krasniqi ka njoftuar se me kryetarët e 12 komunave ka nënshkruar marrëveshjet për financimin e projekteve kapitale.
Sipas Krasniqit përmes këtij granti në vlerë 8 milionë euro, MAPL dhe donatorët financojnë komunat në projekte të cilat kanë për qëllim zhvillimin ekonomik lokal, gjithpërfshirjen dhe dixhitalizimin e shërbimeve komunale.
“Rreth 8 milion euro për 12 komuna përfituese. Me Kryetarët nga komunat përfituese kam nënshkruar marrëveshjet për financimin e projekteve kapitale. Kjo garë ka kuptim vetëm kur gara është transparente dhe se kjo garë tashmë ka rëndësi më të madhe pasi që është institucionalizuar dhe bazohet në ligjin përkatës të votuar në kuvend. Përmes këtij granti, MAPL dhe donatorët financojnë komunat në projekte të cilat kanë për qëllim zhvillimin ekonomik lokal, gjithpërfshirjen dhe dixhitalizimin e shërbimeve komunale. Urime kryetarëve të komunave përfituese”, ka shkruar ai në Facebook./teve1.info/
