Policia e Kosovës ka njoftuar se të premten ka parandaluar një rast të kontrabandës me mallra në fshatin Seqishtë të Hanit të Elezit, ku janë arrestuar tre persona.
Sipas njoftimit rreth orës 03:20 të mëngjesit, njësitë patrulluese kanë arritur të lokalizojnë dhe ndalojnë tri automjete në këtë fshat me të cilat po kryhej kontrabanda e mallrave.
Gjatë kontrollit, në këto automjete thuhet se janë gjetur dhe sekuestruar mallra të ndryshme komerciale, përfshirë veshmbathje, bizhuteri, aksesorë, mjete pune dhe shumë artikuj të tjerë, të cilët dyshohet se po kontrabandoheshin drejt Maqedonisë së Veriut.
Gjithashtu bëhet e ditur se si rezultat i këtij operacioni janë arrestuar M.B., 23 vjeç, shtetas i Maqedonisë së Veriut, A.N., 32 vjeç, shtetas i Maqedonisë së Veriut dhe I.L., 19 vjeç, shtetas i Kosovës.
Me urdhër të Prokurorit të Shtetit, të dyshuarit janë ndaluar për 48 orë, ndërsa mallrat e kontrabanduara dhe automjetet janë sekuestruar dhe dërguar në terminalin doganor në Han të Elezit./teve1.info/
