Instituti i Kosovës për Drejtësi (IKD), ka publikuar raportin: “Dënimet me gjobë – “Leje” për armëmbajtje”.
Në bazë të këtij raporti të IKD-së, politika ndëshkimore e gjykatave për veprat e armëmbajtjes pa leje ka qenë kryesisht e orientuar nga dënime me gjobë, derisa vetëm në raste përjashtuese janë shqiptuar dënime me burgim efektiv.
Ky raport sqaron se veprat penale “Përdorimi i armës apo mjetit të rrezikshëm” dhe “Mbajtja në pronësi, kontroll ose posedim të paautorizuar të armëve” janë dy vepra të ndara.
Përderisa thekson se në rastet kur konsumohen të dy veprat penale, nuk mund të konsiderohet se njëra prej tyre e absorbon tjetrën.
Sipas raportit, IKD gjen se kështu është edhe praktika gjyqësore në shumicën e rasteve të analizuara. Mirëpo, IKD gjen se një gjë e tillë nuk ka ndodhur në gjashtë raste.
Sipas këtij raporti, në gjashtë raste, Prokurori i Shtetit ka ngritur aktakuzë vetëm për përdorim të armës e jo edhe për armëmbajtje pa leje.
Kështu, më tej thuhet se në pamundësi të tejkalimit të akuzës, Gjykata i ka dënuar të pandehurit në këto raste vetëm për përdorim të armës e jo edhe për armëmbajtje pa leje. Raporti thekson se kjo mënyrë e veprimit nga ana e Prokurorit të Shtetit ka amnistuar gjashtë të pandehur nga vepra penale e armëmbajtjes pa leje shkruan kp.
IKD gjen se ka ndodhur edhe e kundërta.
“IKD ka evidentuar tri raste kur Prokurori i Shtetit i ka akuzuar të pandehurit vetëm për armëmbajtje pa leje, përkundër se në dispozitivin e aktakuzës theksohet përdorimi i armës. Kështu, të pandehurit janë dënuar vetëm për veprën penale të armëmbajtjes pa leje e jo edhe për përdorim të armës”, thuhet këtë raport.
Sipas IKD, kjo qasje e Prokurorit të Shtetit që nuk është në linjë as me Kodin NR. 06/L-074 Penal të Republikës së Kosovës dhe as me praktikën e përgjithshme, në këto raste ka amnistuar të pandehurit nga vepra penale e armëmbajtjes pa leje, respektivisht përdorimit të armës.
Hulumtuesi në IKD, Gëzim Shala, në konferencë për medie të premten, tha se në bazë të raporteve ndërkombëtare qindra mijëra armë pa leje janë në duart e qytetarëve dhe kjo sipas tij paraqet rrezik për shoqërinë.
