U arrestuan në qershor të vitit të kaluar, nën dyshimin për bashkëpunim me Agjencinë e Inteligjencës Serbe-BIA
Ndaj dy të dyshuarve për spiunazh, Bedri Shabani dhe Muharrem Qerimi, Prokuroria Speciale ka ngritur aktakuzë të enjten.
“Për dy të pandehurit B.Sh dhe M. Q. ekziston dyshimi i bazuar mirë se secili veç e veç, me veprimet e tyre e kanë kryer veprën penale “Spiunazhi’’ nga neni 124 paragrafi 3 i KPRK–së, kurse, i pandehuri M.Q edhe veprën penale “Mbajtja në pronësi, kontroll ose posedim i paautorizuar i armëve” nga neni 366 par. 1 të KPRK-së”, thuhet nga Prokuroria Speciale.
Nëse kjo aktakuzë konfirmohet, dy të dyshuarit rrezikojnë burgim deri në 12 vite, thotë avokati Xhevdet Smakiqi.
Bazuar në këtë aktakuzë, vlerësohet se shpërfaqet gjendja e brishtë e sigurisë në Kosovë.
Në shtëpitë e Shabanit dhe Qerimit, pas arrestimit ishin sekuestruar dokumente të ndryshme, kompjuterë, telefona, USB, DVR, kaseta, armë, municione, maska, gasmaska ushtarake dhe shumë dëshmi të tjera.
