Presidenti Volodymyr Zelenskyy pritet të marrë pjesë në Konferencën e Sigurisë së Mynihut (MSC), ku lufta me Rusinë dhe mënyra për t’i dhënë fund asaj do të jenë në krye të axhendës, thanë organizatorët të hënën.
Këshilltari për sigurinë kombëtare të Trump, Mike Waltz, tha të dielën se diplomatë të lartë amerikanë do të jenë poashtu në Evropë këtë javë “duke biseduar për detajet se si t’i jepet fund kësaj lufte dhe kjo do të thotë t’i afrohen të dyja palëve në tryezë”.
Në një intervistë në NBC, Waltz tha se ekonomia ruse nuk po shkonte mirë dhe se Trump “është i përgatitur të takojë, të tarifojë dhe të sanksionojë” Moskën për ta çuar Putinin në tryezën e negociatave. Ai shtoi se administrata Trump po kërkon të përdorë angazhimet e kësaj jave për të filluar bisedimet për tërheqjen e një pjese të ndihmës së Shteteve të Bashkuara për Ukrainën dhe tha se aleatët evropianë do të duhet të marrin një rol më të madh në mbështetjen e Ukrainës.
Në ndërkohë, Zelenskyy ka thënë se plani i Donald Trump për një zgjidhje të shpejtë në Ukrainë duhet të përfshijë garanci sigurie. Në një intervistë për transmetuesin britanik ITV, Zelenskyy tha: “Nëse do të kisha kuptuar se Amerika dhe Evropa nuk do të na braktisin dhe do të na mbështesin dhe do të ofrojnë garanci sigurie, do të isha gati për çdo format për bisedime”.
Por, gazeta The Guardian ka raportuar se Moska ka thënë se ka kushtet e veta, ku në mënyrë që një marrëveshje e paqes të arrihet, zëvendësministri i jashtëm rus, Sergei Ryabkov thotë se të gjitha kushtet e presidentit Vladimir Putin për t’i dhënë fund konfliktit në Ukrainë duhet të plotësohen përpara se të jetë e mundur një zgjidhje.
