Sfidat i kanë të shumta.
E për këtë kërkojnë të trajtohen më dinjitetshëm nga shteti.
Andaj në këtë kohë kohë fushate, personat me aftësi të kufizuar kanë edhe disa pritshmëri nga partitë politike.
Për Faruk Kukaj, me rëndësi është trajtimi i duhur.
“Na garantohet e drejta në çdo aspekt apo çdo fushë jetësore, duke u nis nga qasja në infrastrukturë, edukim, shëndetësi, madje edhe në lëvizje të lirë. Cila do le të fitojë por çka është e nevojshme çka kemi të drejtë dhe çka është në mundësi të shtetit le të veprojnë e punojnë në atë drejtim që të kemi ne një jetë më të dinjitetshme dhe më shumë të barabartë me qytetarët tjerë që nuk kanë aftësi të kufizuara”, tha Kukaj.
Nga HANDIKOS bënë të ditur se kanë dërguar një letër zotimi te të gjitha subjektet politike.
“Ne i kemi analizu programet qeverisëse të të gjitha objekteve politike dhe në asnjë program qeverisëse nuk ka çështje që i prekin të drejtat e njeriut të personave me aftësi të kufizuara. Për këtë arsye ne kemi nisur një letër zotim tek të gjitha subjektet politike me disa pika të cilat i prekin drejtpërdrejtë personat me aftësi të kufizuara anë e mbanë Kosovës e të cilat janë të bëshme, janë të realizueshme”, tha kryetari i Shoqatës Handikos, Afrim Maliqi.
Sipas tyre, kjo letër zotimi deri tani është nënshkruar nga Aleanca për Ardhmërinë e Kosovës.
E nga Këshilli për Mbrojtjen e të Drejtave dhe Lirive të Njeriut, thonë se realizimi i premtimeve për këtë kategori të shoqërisë duhet të jetë mision.
“Mendoj se duhet të jetë një politikë përmbushja e nevojave me aftësi të veçanta pavarësisht cilat parti vjen në pushtet dhe këtu nuk duhet në asnjë mënyrë të behën dallime partiake, nuk duhet të ketë ngjyrime politike por thjeshtë kjo është një detyrim ndaj kësaj kategorie të cilën deri më tani asnjë parti që ka qenë në pushtet nuk i ka përmbushur”, tha Behxhet Shala.
Bazuar në të dhënat e regjistrimit të popullsisë të vitit 2024, në Kosovë jetojnë 337 mijë e 859 persona me vështirësi afatgjatë apo 20.3% e popullsisë së përgjithshme.
