Drejtori i Shkollës “Abdullah Shabani”, në Mitrovicë, Nazmi Beka ka demantuar rastin e nënës vetushqyese, e cila deklaroi se djali i saj 11-vjeçar po dhunohet e bullizohet nga bashkëmoshatarët e tij të kësaj shkolle.
Ai tha se 11-vjeçari është fëmijë i cili është larguar nga dy shkolla tjera të Mitrovicës, pasi që ka pasur sjellje delikuente.
Për Tëvë1, Beka tha se fëmija në fjalë është konsumues i cigareve elektronike, madje kundërshton fjalët e nënës së tij, duke thënë se i mituri ka ushtruar dhunë ndaj shokëve të tij.
“E demantoj plotësisht. Ky fëmijë ka ardhur si delikuent në shkollën tonë. Ka qenë më herët edhe në dy shkolla tjera, ku prindi mundet me tregu se pse është larguar prej këtyre shkollave. Është komplet e kundërta – ky fëmijë në mënyrë të vazhdueshme ka pasur sjellje delikuente në shkollën tonë gjë të cilën nuk e lejojmë. Kemi argumente të mjaftueshme që ka qenë konsumues i cigares elektronike dhe që ka ushtruar dhunë ndaj shokëve tjerë”, tha ai.
“Unë kam ndërmjetësuar mes zonjës në fjalë dhe një prindi tjetër që fëmijën e saj e ka paraqitur si dhunues. Kam bërë përpjekje që fëmijët t’i pajtoj mes vete. Gjithë stafi i shkollës është në përpjekje për t’i evidentuar sjelljet e tij e t’i përmirësoj, por megjithatë në mënyrë të vazhdueshme ka qenë i papërmirësueshëm – gjë që nuk e kemi lejuar i kemi marrë masat disiplinore konform me ligjin siç është ndërrim i paraleles përkohësisht edhe masat tjera prë të cilat qëndrojmë pas tyre. Zonja në fjalë në mënyrë të vazhdueshme na ka falënderuar për punën që kemi bërë për këtë fëmijë, ndërsa tash kjo se çfarë paska reaguar qenka një befasi. Jemi të gatshëm t’i argumentojmë të gjitha se është e kundërta”, tha ai./teve1.info/
Nëna vetëushqyese ankohet për bullizim e dhunim ndaj të birit të saj në një shkollë në Mitrovicë
