Me duar të lidhura e i rrethuar nga zyrtarë policorë, Naim Murseli hyri në sallën e gjyqit.
Gjithë kjo masë e sigurisë u ndërmor pasi dyshohet se ai është orkestruesi i vrasjes së ish-bashkëshortes së tij, Liridona Ademaj.
Pavarësisht që prokuroria lexoi aktakuzën dhe dha detaje se si Murseli e kishte planifikuar vrasjen e Liridonës, ai deklaroi tjetër gjë.
Si Murseli nuk vepruan edhe tre të akuzuarit e tjerë.
Sipas aktakuzës nga prokuroria, ai që e shkrepi plumbin në drejtim të viktimës ishte Granit Plava.
Megjithatë, i njëjti u mbrojt në heshtje.
E bashkëpunëtori i tretë i tyre, Kushtrim Kokalla, sipas prokurorisë e njoftoi Murselin me Plavën.
Në aktakuzë thuhet se Kokalla e dinte për aktin dhe nuk i lajmëroi institucionet e rendit.
Të premten, ai para gjyqtares vendosi të mos deklarohet.
Në këtë rast, i vetmi që pranoi fajësinë ishte Tomë Dodaj.
Sipas aktakuzës nga Prokuroria, Dodaj ishte personi që ua shiti Naim Murselit dhe Granit Plavës armën me të cilën është kryer vrasja.
E pranimin e fajësisë nga Tomë Dodaj e mirëpritën prokurorja e rastit, Javorka Prelinqeviq, avokati i familjes Ademaj dhe vëllai i viktimës, Leonard Ademaj.
Fajësinë e tij e pranoi trupi gjykues dhe shpallja e aktgjykimit u bë për 20 minuta.
Gjyqtarja, Fatime Dërmaku e dënoi Dodajn me 5 vjet burgim dhe 5 mijë euro gjobë.
Dërmaku tregoi gjithashtu se rasti i Tomë Dodajt do të ndahet veçmas rastit të Naim Murselit, Granit Plavës dhe Kushtrim Kokallës.
E pas seancës, avokati i tij, Agron Kuqi e pa këtë dënim të lartë duke marrë parasysh që klienti i tij kishte pranuar fajësinë.
Këtë seancë fillestare e vlerësoi në përputhje me ligjin avokati i familjes Ademaj, Leutrim Syla.
Ai tha se nuk u çuditën me mos pranimin e fajësisë nga Naim Murseli.
Gjatë kësaj seance, gjyqtarja tregoi se nëse Naim Murseli, Granit Plava dhe Kushtrim Kokalla gjenden fajtor për veprat që iu ngarkohen, dënimi minimal është 10 vjet burgim, ndërsa maksimali burgim i përjetshëm.
