Premtim elektoral u bë për themelimin e një prokurorie të re.
Nga partia e cila aktualisht është në pushtet, u premtua krijimi i një prokurorie që kompetencë do e ketë vetëm ndjekjen e rasteve të korrupsionit.
Mirëpo, krijimi i këtij mekanizmi të ri, vlerësohet si vështirë i realizueshëm ligjërisht.
“Ligjërisht është i pamundur sepse edhe Kushtetua e Republikës së Kosovës, por edhe ligji për Gjykatat, ligji për Prokurorinë, i ka të përcaktuara këto prokurori dhe këto gjykata. Dhe rrjedhimisht, nuk mundesh me i kriju edhe një prokurori që do të merrej, siç kanë thënë vetëm me korrupsionin, sepse e prish rendin dhe rregullimin e prokurorive të shtetit”, tha avokati Visar Rrecaj.
Bazuar në këtë, ky premtim shihet si joserioz.
“Edhe nëse themelohet një prokurori e re, prapë se prapë ajo do të jetë pjesë e këtij sistemi prokurorial, për shkak se nuk mund të dalë nga ky sistem prokurorial përderisa kemi këtë Kushtetutë. Kështu që, përgjithësisht po e them se është një premtim joserioz, një premtim definitivisht i pakuptueshëm”, tha Gzim Shala nga IKD.
Krahas kësaj prokurorie, premtime pati edhe për krijimin e një Gjykatë të re, me kompetencë çështjet familjare.
