Njëri prej veprimeve të para si president i SHBA-së, Donald Trump pezulloi të gjitha programet dhe grantet pa masë përjashtuese të miratuara nga Sekretari i Shtetit.
Nga SHBA-ja, fonde merr edhe Gjykata Speciale në Hagë.
Nëse nga këto vendime të Trumpit, do të ndikohet edhe puna dhe financat për Specialen, nga kjo Gjykatë nuk kanë dhënë qëndrim.
E nëse ky pezullim ndodhë, atëherë vlerësohet se hendeku i financave mund të mbulohet nga shtetet tjera kontribuese.
“Mund të ndodhë që derisa të zgjidhet çështja anëtarët e shteteve të Unionit Evropian do t’i bëjnë pagesat të cilat janë të domosdoshme. Megjithatë, është një çështje juridike e vështirë me u elaboru nga publikimet kontraktuale. Veprimi i presidentit është identik me veprimet e politikanëve tanë, të cilët për ta kënaqur elektoratin e padijshëm juridikisht, nxjerrin kësi lloj vendimesh”, ka deklaruar avokati, Kadri Osaj.
Bazuar në deklaratat e mëhershme të akterëve të administrates Trump ndaj Speciales dhe ish kryeprokurorit Jack Smith, rishikimi i punës dhe buxhetit të shpenzuar te Specialja, do të mund t’i konvenonte krerëve të UÇK-së në Hagë.
“Shtetet e Bashkuara të Amerikës në një farë mënyre të kërkojnë llogaridhënie për shpenzimin e buxhetit amerikan në Dhomat e Specializuara, por eventualisht kemi pasur edhe deklarata se ata dyshojnë edhe në punën e Jack Smith, pra stafit Shteteve të Bashkuara të Amerikës në Dhomat e Specializuara. Mund të vie deri tek një raport të kërkohet ndoshta anulimi apo zhvlerësimi i gjithë punës së Jack Smith, e që kjo mund të ndikojë në zhbërjen e aktakuzës së krerëve të UÇK-së”, ka thënë avokati, Xhevdet Smakiqi.
Financiarisht puna e Gjykatës Speciale mbështetet edhe nga BE-ja, Kanada, Norvegjia, Zvicra dhe Turqia.
