Krasniqi ka thënë se nga Qendra e Mjekësisë Familjare në Obiliq janë larguar disa mjekë, dhe sipas saj këtë mendim e kanë edhe disa mjekë të tjerë.
“Kemi pasë largim të disa prej mjekëve që vetëm punojnë aty edhe në bisedë me kolegë të tjerë shumica prej tyre e kanë këtë mendim dhe këtë zgjedhje nisën drejt kësaj, me u largu prej vendit me vazhdu specializimin edhe punën në një vend tjetër jashtë Kosovës”
Tutje ajo ka thënë se largimi i mjekëve nga QKMF-ja e Obilqit e vështirëson dhënien e kujdesit ndaj pacientëve.
“Normal që e bënë më të vështirë punën edhe për pjesën tjetër të mjekëve që mbesin në Qendër për shkak se kur fluksi i pacientëve rritet atëherë mundësia e dhënies së kujdesit normal që kufizohet”, ka thënë ajo në Info Nata.
Krasniqi theksoi se edhe ajo është njëra ndër mjeket që mendon të largohet nga vendi për të punuar në një vend tjetër.
“Po, edhe unë jam në rrugën e njëjtë si kolegët e tjerë duke i përcjellë këto mundësi për kyçjen në punë dhe në specializim jashtë vendit”, tha ajo.
Krasniqi ka cekur edhe arsye se pse mjekët po largohen nga vendi.
Ajo tha se njëra ndër arsyet është pritja shumë e gjatë për specializim.
“Besoj që është e njohur për të gjithë kolegët të cilët kanë diplomuar, kanë pritur diku pesë vite për hapje të specializimeve, shumë prej tyre ndoshta nuk kanë qenë të kyçur as në punë në Qendra të Mjekësisë Familjare apo në spitale rajonale, ata kanë pritur pesë vjetë pa u kyçur në punë”.
Sipas saj mundësia e punësimit për mjekë të rinjë është shumë e ulët.
Ndërsa vetëm gjatë muajit mars janë larguar mbi 20 mjekë nga vendi, e sipas ekspertëve nëse vazhdohet kështu për 10 vite, spitalet në Kosovë do të fillojnë të mbyllen.
https://teve1.info/lajmet/per-nje-muaj-u-larguan-mbi-20-mjeke-nga-kosova/
