23 janari i vitit 1916 e gjeti në Podgoricë.
Nga Shqipëria, Isa Boletini me djem e nipa, shkoi në Mal të Zi.
Krejt kjo pasi konsulli francez, atyre iu kishte bërë një premtim.
“Fatkeqësisht konsulli francez kishte pasur marrëdhënie të mira me Krajl Nikollën dhe komplet qeverinë e tij e sidomos me dhëndrrin e Krajl Nikollës, cili në atë kohë ishte edhe ministër i Punëve të Jashtme malazeze dhe kështu në marrëveshje me të, e bijnë Isën me grupin e tij me varkë deri në Tivar”, ka thënë Gazmend Boletini, stërnipi i Isa Boletinit.
Ai ka zbuluar se si rrodhën ngjarjet në ditën tragjike të atij janari në Podgoricë.
“Në janarin e ftohtë të vitit 1916 me 23 janar, ka qenë ditë tregu, ku nipi i Isa Boletinit, Jonuzi, kishte shkuar me ble një kali për tu kthyer në Kosovë dhe matanë urës së Ridnicës ishin rrethuar nga forcat malazeze. Kështu që viktima e parë ka qenë Jonuzi, për arsye se ky ka qenë me veshje kombëtare dhe ushtria kishte qenë në dilemë a është ky Isa Boletini apo jo. Isa Boletini ka dal me grupin dhe ajo betejë nuk ka zgjatur shumë”, tregon Gazmend Boletini.
Por, kush e tradhtoi, heroin kosovar?
“Isa Boletinin e tradhtoi Franca, konsulli francez i cili atë kohë ishte me detyrë në Shkodër. Emri i tij i vërtetë Bichoc ashtu e citon Tafili shumë bukur. Ai kishte bërë marrëveshje që të ia dorëzonte Isa Boletinin Malit të Zi, me tradhti. Ishte Franca ajo që e tradhtoi”, tregon stërnipi i patriotit Boletini.
Nga ky grup shpëtoi vetëm njëri nga djemtë e Isa Boletinit dhe i nipi.
Kjo meqë pak minuta pas vrasjes së grupit kosovar, Austro – Hungaria e pushtoi Malin e Zi.
“Austro-Hungaria nuk i ka lënë me i prek kufomat. E kanë sjell hoxhën, klerikun mysliman i cili i ka kryer të gjitha ritet fetare dhe në fund ushtria Austro-Hungareze iu ka dhënë nderim ushtarak
Isa Boletinit dhe grupit të tij”, tregon ai.
Ndryshe, të enjten janë bërë 109 vjet nga vrasja e Isa Boletinit.
