Prezantimi i raportit vjetor të Stacionit Policor në Lipjan i bëri bashkë në sallën e Kuvendit Komunal.
Pjesë e këtij organizimi ishte edhe kryetari i Komunës, Imri Ahmeti dhe përfaqësues nga organizata tjera jo qeveritare.
Komandanti i stacionit, Argjent Gashi e vlerësoi përgjithësisht të qetë situatën e sigurisë, derisa theksoi se angazhimi i policëve në veri ka afektuar edhe ta.
“Gjatë vitit patëm edhe një rast shumë të rëndë të vrasjes në Zllakuqan i cili në aspektin e punës policore ishte mjaft sfidues në kuptimin e menaxhimit të asaj situate dhe parandalimit të hakmarrjes eventuale, po ashtu zbulimin e shkaqeve që çuan kryerësin në këtë akt kriminal. Shumë sfiduese gjatë sezonës verore dhe temperatura shumë të larta kishim edhe zjarret në zonën tonë si ndezje të amullive po ashtu edhe zjarret në pyje”, Argjent Gashi, komandat i stacionit policor në Lipjan.
Sipas tij, sfiduese ishin kushtet e punës që tha se kanë penguar angazhimin e tyre në kryerjen e detyrave dhe autorizimeve ligjore.
E kryetari i Lipjanit, Imri Ahmeti tha se janë falënderues ndaj policëve për gatishmërinë e tyre në ofrimin e sigurisë.
“Do ta keni mbështetjen tonë në kuadër të fuqisë ligjore për aq sa na lejojnë përgjegjësitë tona në mënyrë që puna juaj në shërbim të qytetarëve të jetë më efikase. Natyrisht se vështirësitë dhe sfidat nuk janë të lehta as për juve dhe institucionet tjera por ajo që është e rëndësishme të them, kemi gatishmërinë e bashkëpunimit dhe ndihmës për aq sa kemi përgjegjësinë si institucion i Komunës”, ka thënë Ahmeti.
Ndërsa drejtori Rajonal i Policisë në Prishtinë, Basri Shabani tha se objektivi kryesor për shkurtimin e kohës së reagimit është arritur.
“Na duhet pak më tepër me punu sa i përket policisë sektoriale, policit të lagjes siç njihet tek qytetarët, qytetari dëshiron dhe ka të drejtë të dijë se kush është polici i lagjes. Ne kemi bërë përpjekje dhe kemi shpërndarë pasaporta të quajtur polici i lagjes për të njoftuar qytetarët se kush është përgjegjës për zonën e tij dhe kujt me iu drejtu”, tha Basri Shabani, drejtor rajonal i Policisë në Prishtinë.
Në raportin e prezantuar shihet se ka ulje në trendin e krimit dhe rritje të zbulueshmërisë së veprave penale, dhe në rastet e dhunës në familje dhe rastet e vetgjyqësisë nga qytetarët.
Ndërkaq, si sfidë u përmend numri i pamjaftueshëm i veturave në përdorim, mungesa e pajisjeve teknologjike si kompjuterë e fotokopje dhe mungesë e personelit dhe eprorëve në stacion.
