Prokuroria Themelore në Prishtinë ka njoftuar se të hënën ka ngritur aktakuzë ndaj dy personave për rastin e rrëzimit të kulmit të Komunës së Prishtinës.
Sipas njoftimit Prokurori i Shtetit dhe të pandehurit kanë arritur marrëveshje për pranimin e fajësisë dhe me rastin e ngritjes së aktakuzës i është propozuar gjykatës që të pandehurit të obligohen të kompensojnë dëmin material në shumën prej 36,450.29 eurosh që i është shkaktuar buxhetit të Republikës së Kosovës dhe të ngarkohen me shpenzimet e procedurës penale.
I pandehuri Y.J. thuhet se akuzohet se në cilësinë e personit zyrtar, si Menaxher i Kontratës “Rikonstruimi i kulmit të objektit të Komunës së Re” në vlerë totale prej 386,096.20 eurosh, duke shfrytëzuar detyrën apo autoritetin zyrtar ka vepruar në atë mënyrë që me dashje direkte dhe me qëllim që në mënyrë të kundërligjshme të përfitojë dobi pasurore kompania, ka përpiluar raport dhe ka pranuar se kinse janë kryer punimet e kulmit të ndërtesës së Komunës së Re të Prishtinës edhe pse realisht aty nuk ishin bërë punimet sipas kontratës në pozicionet 2.2, 2.3, 5.1.5.13 dhe 5.14, duke ia mundësuar të kryhen pagesat në drejtim të kompanisë, në këtë mënyrë është dëmtuar buxheti i Republikës së Kosovës në shumën prej 36,450.29 eurosh, me çka ka kryer veprën penale të keqpërdorimit të pozitës apo autoritetit zyrtar.
Ndërkaq, i pandehuri B.B. akuzohet se në cilësinë e personit përgjegjës të kompanisë, i cili ishte i ngarkuar në kryerjen e punimeve të mbikëqyrjes dhe kryerjes së punëve ndërtimore dhe përfundimit të punëve ndërtimore “Rikonstruimi i kulmit të objektit të Komunës së Re”, ka vepruar në kundërshtim me standardet profesionale përgjithësisht të pranuara dhe në kundërshtim me kushtet e parapara në kontratë, për sanimin e kulmit të ndërtesës, me ç’rast gjatë ekzekutimit të kontratës ka kryer punë të tjera, e jo ato sikurse në pozicionet 2.2, 2.3, 5.1.5.13 dhe 5.14, të kontratës së lartcekur, ku ditën kritike për shkak të kushteve atmosferike nga ndikimi i erës një pjesë e kulmit të ndërtesës së Komunës së Re bie në tokë, në pjesën e rrugës, trotuarit dhe objektit përreth, duke lënduar rëndë të dëmtuarën E.U, në këtë mënyrë është dëmtuar buxheti i Republikës së Kosovës në shumën prej 36,450.29 eurosh dhe janë shkaktuar dëme materiale në pesë veturat e parkuara përreth ndërtesës, me çka ka kryer veprën penale “Punime ndërtimore të kundërligjshme”.
Më 18 janar të vitit të kaluar një 23 vjeçare pësoi lëndime të rënda trupore pasi u godit nga pjesë të çatisë së rrëzuar të objektit të ri të Komunës së Prishtinës.
Si pasojë e rrëzimit të kulmit u demoluan edhe shumë nga automjetet e parkuara afër ndërtesës së re të komunës./teve1.info/
