Koalicioni për Familjen në kuadër të aktiviteteve të fushatës zgjedhore ka organizuar një performancë artistike me titull “Koalicioni për Familje pjek kafe për mysafirë”.
Ky aktivitet që do të bëhet nga aktori Sokol Plakolli, sipas njoftimit do të organizohet çdo ditë nga data 20 janar deri më 7 shkurt, nga ora 12:00 deri në ora 13:00, në Sheshin Skënderbeu, afër Parlamentit.
Po ashtu bëhet e ditur se kjo ngjarje do të zhvillohet si pjesë e kampanjës “Shqiptari në Parlament” dhe thuhet se ka për qëllim t’i ofrojë qytetarëve mundësinë të takohen dhe të bisedojnë me kandidatët e Koalicionit për Familjen.
“Sokol Plakolli, kandidati për deputet të pavarur dhe pjesë e listës së Koalicionit për Familjen, i cili do të jetë i veshur me rroba tradicionale, do të presë mysafirët për një moment të veçantë dhe të ngrohtë në këto ditë dimri. Ftojmë të gjithë qytetarët dhe mbështetësit e koalicionit të bashkohen në këtë ngjarje dhe të jenë pjesë e kësaj performance artistike, duke e bërë një moment të veçantë dhe të paharrueshëm”, thuhet në njoftimin për media.
Këtij aktiviteti i është bashkuar të hënë edhe Ferid Agani, kryetar i Partisë së Drejtësisë, pjesë e Koalicionit për Familjen.
“Sot ju bashkangjita performancës artistike të kandidatit për Kuvend të Republikës, Sokol H Plakolli. Bashkëbisedova me qytetarët për themelet e shtetit të ndërtuara mbi familjen dhe traditën, kështu duke nderuar punën dhe veprën e secilit qytetar të vendi”, ka shkruar Agani.
