Paneli Zgjedhor për Ankesa dhe Parashtresa e ka dënuar me 12 mijë euro gjobë AAK-në për siç thuhet shkelje të “Kodit të Mirësjelljes” gjatë fushatës zgjedhore.
Në njoftim thuhet se me datë 13 janar PZAP- ka pranuar një ankesë nga LVV-ja me të cilën pretendohet se në tubimin politik të AAK-së kryetari Ramush Haradinaj duke iu drejtuar Kurtit me fjalë ‘duhet të heqim mashtruesin’ dhe ‘nuk duam më lojëra me sigurinë kombëtare pas shpinës së aleatëve tanë në interes të Serbisë e Rusisë nga argati i tyre’ ka drejtuar akuza të pabaza dhe të pa vërtetuara.
Po ashtu thuhet se në ankesën e VV-së është përmendur edhe kandidati për deputet nga AAK-ja, Ardian Gjini i cili ka thënë ‘është byro e korrupsionit’ duke potencuar sipas VV-së karakteristikat e një regjimi totalitarist të qeverisë së Albin Kurti.
Sipas PZAP-së ankesa është vlerësuar e bazuar pasi është konstatuar se Haradinaj dhe Gjini me qëllim të etiketimit të subjektit politik Lëvizja Vetëvendosje dhe promovimit të subjektit politik Aleanca për Ardhmërinë e Kosovës kanë nxitur urrejtjen ndaj kryetarit të subjektit Lëvizja Vetëvendosje, Albin Kurti në atë mënyrë që përmes përdorimit të gjuhës denigruese dhe urrejtëse kanë bërë akuza ndaj tij./teve1.info/
