Në njoftimin e MF-së thuhet se ministri i Financave, Punës dhe Transfereve, Hekuran Murati dhe zëvendës Presidenti i Bankës Evropiane për Rindërtim dhe Zhvillim, Alain Pilloux në javën e takimeve vjetore në Marakesh kanë nënshkruar Marrëveshjen për Energji Efiçiente për Prizrenin.
Bëhet e ditur se kjo marrëveshje kap vlerën prej 6 milionë e 315 mijë euro.
“Ministri Murati ka vlerësuar lartë bashkëpunimin e vazhdueshëm me BERZh-in, si një partner i rëndësishëm për avancimin e tranzicionit energjetik të Kosovës dhe zhvillimin e qëndrueshëm ekonomik.Në anën e tij, zëvendës Presidenti i BERZh, Alain Pilloux ka thënë se për një shtet i cili deri vonë nuk mund ta imagjinonte të ardhmen e energjisë pa linjit, progresi i Kosovës nuk mund të ishte më i madh se kaq. Gjithashtu, ai ka theksuar se Kosova tashmë është duke punuar intenzivisht në një model të cilin çdo shtet duhet ta ndjek, përkatësisht kombinimin e energjisë efiçiente me energji të ripërtrishme.”, thuhet në njoftim.
Projekti i cili financohet nga kjo marrëveshje parasheh implementimin e masave të efiçiencës në 100 objekte komunale, duke përfshirë kopshte, shkolla dhe qendra të kujdesit shëndetësor parësor. Masat e propozuara për efiçiencë përfshijnë përmirësimin dhe ndërrimin e sistemeve të ngrohjes, izolimin termik të ndërtesave dhe instalimin e dritareve dhe dyerve me efiçiencë të energjisë./teve1.info/.
